Bu gün Rusiyanın "Krılya Sovetov" klubunun yeni transferləri ilə azarkeşlər arasında görüş keçirilib.
Sportnet.az-ın klubun rəsmi saytına istinadən məlumatına görə, tədbirdə yay fasiləsində Samara təmsilçisinə qoşulan 13 yeni futbolçu, baş məşqçi Andrey Tixonov və baş direktor Vitali Şaşkov iştirak edib. Ümumi fotodan sonra komanda üzvləri azarkeşlərlə sərbəst ünsiyyətdə olublar. Onlar özlərini qeyri-adi ampluada da sınayıblar. Azərbaycan millisinin hücumçusu Ramil Şeydayev bu zaman azarkeşlərə qarpız qonaqlığı verib.
Futbolçular azarkeşlərin suallarını da cavablandırıblar. "Krılya Sovetov"un ev oyunlarına abonement sahibləri arasında uduş keçirilib. Lotereyanın köməkliyi ilə 13 yeni transferin oyun forması uduşa qoyulub.
"Krasnodar"la Rusiya Premyer Liqasının oyunu ərəfəsində təşkil edilmiş görüşə 400 tamaşaçı qatılıb. Sentyabrın 24-də Samarada keçiriləcək görüş Bakı vaxtı ilə saat 19:30-da başlanacaq.
