İngiltərənin paytaxtı Londonda FIFA-nın "The Best" mükafatın qalibləri açıqlanıb.
Sportnet.az xəbər verir ki, tədbirdə əvvəlcə 2018-ci ilin ən yaxşı qolunun müəllifi müəyyənləşib. Bu, İngiıtərənin "Liverpul" klubunun futbolçusu Məhəmməd Salahdır. Misirli yarımmüdafiəçi "Everton"la matçda vurduğu qola görə mükafatlandırılıb.
Daha sonra ən yaxşı baş məşqçinin adı məlum olub. Bu, Fransa milli komandasına rəhbərlik edən Didye Deşamdır. Deşamın rəhbərliyi altında yığma dünya çempionu olub. O, İspaniya "Real Madrid"inə Çempionlar Liqasını qazandırmış Zinəddin Zidanı və Xorvatiya yığmasını dünya çempionatında finala çıxarmış Zlatko Daliçi üstələyib.
Növbəti nominasiya "ən yaxşı qapıçı" olub. Bu nominasiyada Belçika yığmasının və hazırda İspaniya "Real Madrid"inin qapısını qoruyan Tibo Kurtua qalib sayılıb. O, Fransa millisinin və İngiltərənin "Tottenhem" klubunun qapıçısı Uqo Lyoris, eləcə də "Lester"in və Danimarka yığmasının qolkiperi Kasper Şmeyxeli üstələyib.
Qadınlardan ibarət komandalar arasında ən yaxşı baş məşqçi nominasiyasında Reynal Pedros fərqləndirilib. O, Fransa "Lion"una Çempionlar Liqasını qazandırıb. Pedros Yaponiya millisindəki həmkarı Asako Takakura və Almaniya yığmasına rəhbərlik edən Sarina Viqmandan üstün olub.
Ən yaxşı fanat nominasiyasında Peru azarkeşləri birinci yeri tutub.
"Fair Play" mükafatına Türkiyənin "Erzurumspor BB" klubunun almaniyalı hücumçusu Lennart Tay layiq görülüb.
Rəmzi yığmanın tərkibi isə belə olub: David De Xea, Dani Alveş, Marselo, Serxio Ramos, Rafael Varan, Eden Azar, NQolo Kante, Luka Modriç, Kriştianu Ronaldu, Kilian Mbappe, Lionel Messi. Ronaldu və Messi mükafatlandırma mərasimində iştirak etməyib.
Ən yaxşı qadın futbolçu adına 6-cı dəfə braziliyalı Marta layiq görülüb. Hazırda ABŞ-ın "Orlando Prayd" klubunda çıxış edən 32 yaşlı hücumçu Ada Hegersberq ("Lion" Fransa, Norveç) və Cenifer Marojanı ("Lion" Fransa, Almaniya) üstələyib.
Nəhayət, ilin ən yaxşı futbolçusu açıqlanıb. FIFA prezidenti Canni İnfantino mükafatı təqdim etmək üçün İspaniya "Real Madrid"inin və Xorvatiya yığmasının yarımmüdafiəçisi Luka Modriçi səhnəyə dəvət edib. Modriç İngiltərə "Liverpul"unun misirli hücumçusu Məhəmməd Salah və hazırda İtaliya "Yuventus"unda çıxış edən portuqaliyalı forvard Kriştianu Ronaldunu qabaqlayıb.
------------------------
Bu gün FIFA İngiltərənin paytaxtı Londonda "The Best” mükafatının qaliblərini açıqlayacaq.
Sportnet.az xəbər verir ki, Bakı vaxtı ilə saat 22:30-da start götürəcək tədbirdə 2018-ci ilin ən yaxşı baş məşqçisi və futbolçusu elan olunacaq. Mərasimə FIFA-ya üzv olan 211 milli assosiasiyanın baş məşqçiləri, eləcə də 6 konfederasiyanın üzvləri dəvət alıb.
Azərbaycan millisinin və "Qarabağ"ın baş məşqçisi Qurban Qurbanov FIFA-nın 2018-ci il dünya çempionatının yekunlarına həsr edilən konfransına və "The Best" adlı mükafatlandırma mərasiminə qatılmaqdan imtina edib. 46 yaşlı mütəxəssis səbəb kimi sentyabrın 23-də "Qəbələ" ilə Azərbaycan Premyer Liqasında vacib oyunlarının olmasını göstərib. Tədbirə AFFA-nın baş katibi Elxan Məmmədov və AFFA-nın texniki direktoru Bernhard Lippert yollanıb.
FIFA-nın fərqli nominasiyalar üzrə təsis etdiyi "The Best" mükafatında 2018-ci ilin ən yaxşı futbolçusu adına xorvatiyalı Luka Modriç ("Real Madrid"), misirli Məhəmməd Salah ("Liverpul") və portuqaliyalı Kriştianu Ronaldu ("Yuventus") namizəddir. Ən yaxşı baş məşqçi isə fransalılar - Didye Deşam (Fransa millisi), Zinəddin Zidan ("Real Madrid"in sabiq baş məşqçisi) və ya Zlatko Daliç (Xorvatiya millisi) seçiləcək.
Tədbirdə ən yaxşı qadın baş məşqçi, ən yaxşı qapıçı, ən yaxşı qol və ən yaxşı azarkeş aksiyası nominasiyaları üzrə qaliblər də elan olunacaq. Bundan başqa, FIFA-nın "Fair Play” müskafatı təqdim ediləcək. Həmçinin, FIFA/FIFPro World 11 versiyasına əsasən, ilin simvolik komandası açıqlanacaq.
Qeyd edək ki, ilin ən yaxşı futbolçusu milli komandaların baş məşqçi və kapitanları, eləcədə jurnalistlərlə azarkeşlər arasında aparılan səsvermə ilə müəyyənləşdirilir. Ötən il bu mükafata Portuqaliya millisinin və İtaliyanın "Yuventus” klubunun futbolçusu Kriştianu Ronaldu layiq görülüb. Bu dəfə son 12 ildə ilk dəfə Argentina millisinin və İspaniyanın "Barselona” komandasının hücumçusu Lionel Messi ən yaxşı futbolçu nominasiyası üçün yekun siyahıda yer almayıb.
