İspaniya La Liqasının X turunun mərkəzi görüşündə "Barselona" və "Real Madrid" komandaları üz-üzə gəlib. `
Sportnet.az-ın məlumatına görə, "Nou Kamp" stadionunda keçirilmiş qarşılaşma meydan sahiblərinin böyük hesablı qələbəsi ilə yekunlaşıb - 5:1. "Barsa"nın ilk qolunu 11-ci dəqiqədə Filippe Koutinyo vurub. Bundan sonra səhnəyə Luis Suares çıxıb. Uruqvaylı hücumçu 30-cu dəqiqədə penaltidən, eləcə də 75-ci də 83-cü dəqiqədə fərqlənərək, het-trik edib. Penalti VAR sisteminə müraciət olunduqdan sonra təyin olunub. Oyunda son nöqtəni 87-ci dəqiqədə Arturo Vidal qoyub. "Kral klubu"ndan isə yeganə topu 50-ci dəqiqədə Marselo vurub.
Bu qələbə sayəsində xallarını 21-ə çatdıran "Barselona" yenidən liderliyə yüksəlib. 14 xala malik "Real Madrid" isə 9-cu pillədə qərarlaşıb.
------------------------
Bu gün İspaniya La Liqasının X turunda əzəli rəqiblər - "Barselona” və "Real Madrid” qarşılaşacaq.
Sportnet.az-ın məlumatına görə, 2007-ci ildən bu yana El Klasikoda ilk dəfə Lionel Messi və Kriştianu Ronaldudan hər hansı biri olmayacaq.
Ronaldu İtaliya "Yuventus”una transfer olub, Messi icə zədə səbəbindən bu oyunda iştirak edə bilməyəcək. Kataloniya təmsilçisində Samüel Yumtiti və və Tomas Vermalen, "kral klubu”nda isə Daniel Karvaxal və Mariano Diasın durumu matç saatlarında dəqiqləşəcək.
Bu mövsüm hər iki komanda gözlənilən səviyyədə çıxış etmir. Buna baxmayaraq, Kataloniya klubu IX turu 18 xalla lider mövqeyində başa vurub. Ernesto Valverdenin komandası El Klasikoda qələbə qazana bilməsə, X turun yekununda La Liqada lider dəyişəcək. Artıq "Atletiko Madrid” X turun ilk günündə doğma meydanda "Real Soseydad”a qalib gələrək xallarını 19-a çatdırıb. Mövsümə Xulen Lopeteginin rəhbərliyi altında başlayan "Real Madrid” isə 9 turdan sonra 14 xalla 7-ci yerdə qərarlaşıb.
"Nou Kamp" stadionunda Bakı vaxtı ilə saat 19:15-də başlanacaq El Klasikonu Xose Mariya Sançes Martines idarə edəcək.
Qeyd edək ki, 1916-cı ildən etibarən iki komanda arasında 237 rəsmi oyun keçirilib. El Klasikoda 95 dəfə "Real Madrid”, 93 dəfə "Barselona” qələbə qazanıb. Daha 49 matçda qalib müəyyənləşməyib. Topların nisbəti də "kral klubu"nun xeyrinədir - 401:387.
İspaniya La Liqası, X tur
28 oktyabr
19:15. "Barselona" - "Real Madrid" - 5:1
Qollar: Filippe Koutinyo, 11. Luis Suares, 30 (pen.); 75; 83. Arturo Vidal, 87 - Marselo, 50
