Dieqo Kostanın bu həftə ayağından əməliyyat olunmasına baxmayaraq, İspaniya "Atletiko”su qış transfer pəncərəsində yeni hücumçu transfer etməyəcək.
Sportnet.az-ın məlumatına görə bu barədə Madrid komandasının baş məşqçisi Dieqo Simeone "Alaves”lə görüş öncəsi mətbuat konfransında açıqlama verib. Argentinalı mütəxəssis bildirib ki, əsas forvard sağalanadək sərəncamındakı hücumçuların xidmətlərindən yararlanacaq: "Bu mövzu barədə rəhbərliklə danışmamışıq. Hazırda əlimizdə olan oyunçularla işləyirik. Nikola Kaliniç və Anxel Korrea mərkəz hücumçusu mövqeyində çıxış edə, Jelson Martins və Vitolo da Antuan Qrizmannın arxasında oynaya bilər. Kosta zədəsini sağaldanadək əlimizdəki seçim imkanları bunlardır”.
Qeyd edək ki, "Atletiko"nun "Selta”nın forvardı Maksi Lopeslə yaxından maraqlandığı bildirilir. Dieqo Kosta iki ayadək sıradan çıxıb.
