"Vacib 2 xal itirdik. Qış gasiləsinə 5 xal öndə getmək istəyirdik. Amma alınmadı, bu gün qələbə qazana bilmədik".
Sportnet.az xəbər verir ki, bunu "Neftçi" klubunun futbolçusu Namik Ələsgərov Topaz Premyer Liqasının XIV turunda evdə "Sumqayıt"la 0:0 hesablı heç-heçə etdikləri oyundan sonra mətbuat konfransında deyib. Yarımmüdafiəçi daha sonra jurnalistlərin suallarını cavablandırıb...
- Nəyə görə "Neftçi" qapanan komandalara qarşı qələbə qazanmaqda çətinlik çəkir? Məşqlərdə belə komandalara qarşı hazırlaşırsınız?
- Qapalı komandaya qarşı oynamaq hər komanda üçün çətindir. Biz məşqlərdə hər cür komandalara qarşı hücumlara hazırlaşırıq. Bu gün "Sumqayıt" yaxşı müdafiə olundu və qələbə qazana bilmədik.
- "Sumqayıt" meydana 5 müdafiəçi ilə çıxmışdı, əvəzetmədən sonra daha 2 müdafiəçi də oyuna daxil oldu. 7 müdafiəçiyə qarşı oynamaq necə idi?
- Doğrudan da "Sumqayıt" bu gün yaxşı müdafiə olundu, boşluq vermədi. Həm də düzgün qeyd etdiniz ki, meydanda 7 müdafiəçi var idi. Yarımmüdafiəçi geri çəkilib oynayanda boşluqlar tapmaq olur, amma 7 müdafiəçiyə qarşı oynamaq doğrudan çox çətin idi.
- Əsas rəqibiniz "Qarabağ" 6 qol ilə qələbə qazandı. Düşünmürsünüz ki, onlar artıq özünə gəliblər və mübarizə daha da çətinləşəcək?
- Onların da xal itirdiyi oyunlar olub. Biz də onları məğlub etmişik, başqa oyunlarda xal itirmişik. Bu, uzun yarışdır və sona qədər mübarizə aparıb çempion olmaq istəyirik.
- Qurban Qurbanov milli komandadan ayrılıb, "Qarabağ"ın artıq Avropa Liqasındakı çıxışı sona çatır. Sizcə, çempionatın ikinci yarısında mübarizə necə olacaq?
- Düzdür, qışdan sonra daha çətin olacaq. Amma biz qış fasiləsində yaxşı hazırlıq keçib çempion olmaq üçün əlimizdən gələni edəcəyik.
- Qurban Qurbanov milli komandadakı postundan ayrılıb, bu barədə nə deyə bilərsiniz?
- Bu barədə heç nə demək istəmirəm. Bu, Qurban Qurbanov və AFFA rəhbərliyi arasında olan məsələdir.
- Növbəti oyunlar da kubokda "Sumqayıt"la qarşılaşacaqsınız. Sizcə, həmin oyunlar necə keçəcək?
- Həmin oyunlar da çox çətin keçəcək Kubokda da hədəfimiz finala çıxıb, qalib olmaqdır.
- Yeni gələn oyunçular necədir?
- Yəqin ki, izlənilib və məsləhət bilinib deyə komandaya transfer ediliblər. Mamadu Kanu məşqlərdə iştirak edir, Mamadu Mbodj isə hələ təzə transfer olunub və komandaya qoşulmayıb.
