Topaz Premyer Liqasının 9-cu turunun mərkəzi oyununda sabah "Neftçi"nin qonağı olacaq "İnter" heç cür optimal heyətlə hazırlıq keçə bilmir. Sportnet.az-ın məlumatına görə, hazırda "bankirlər"in 2 futbolçusu zədədən əziyyət çəkir.
Sezar Meza Kollinin çoxdankı zədəsi yenicə sağaldığından və futbolçu hələ də formasını bərpa etməklə məşğul olduğundan, sabah meydana çıxa bilməyəcək. Aleksandr Amisulaşvilinin durumu isə qeyri-müəyyəndir. "Simurq"la ötən tur matçında komanda yoldaşı Yohan Bokonyano ilə toqquşan gürcüstanlı müdafiəçidə beyin silkələnməsi olmasa da, o, hələ də başağrısından əziyyət çəkir.
Qeyd edək ki, "Neftçi" - "İnter" oyunu sabah "Baksell Arena"da keçiriləcək və saat 16:00-da başlayacaq.
