"Qarabağ" və "Qəbələ" komandaları oktyabrın 17-də 56-cı dəfə üz-üzə gələcək.
Sportnet.az-ın məlumatına görə, bu, Azərbaycan Premyer Liqasında VI tur matçına təsadüf edəcək. “Qəbələ” milli komandaların oyunları ilə əlaqədar yaranan fasilədən sonra ilk matçına çıxacaq. “Qırmızı-qaralar” səfərdə “Qarabağ”la görüşəcək. Bu matç Bakıdakı “Azersun Arena”da keçiriləcək.
İndiyədək rəqiblər Premyer Liqada 46, Azərbaycan Kubokunda 9 duelə çıxıblar. Bu 55 görüşdə 12 qələbə qazanan “Qəbələ” 18 heç-heçə edib. 25 dəfə isə Ağdam klubu qalib gəlib. 48 dəfə rəqib qapısına yol tapan "qırmızı-qaralar" 72 top buraxıblar.
Premyer Liqada 10 qələbə və 13 heç-heçəsi olan “Qəbələ” 23 dəfə uduzub. "Qarabağ" top fərqində də öndədir – 64:41.
Rəqib meydanında 28-ci dəfə “Qarabağ”la üz-üzə gələcək “qırmızı-qaralar” əvvəlki 27 səfərdə 4 dəfə qalib gəlib. Hesabında 9 heç-heçə olan “Qəbələ” 14 dəfə uduzub. Səfərdə 20 dəfə rəqib qapısına yol tapan komanda 40 top buraxıb.
Qeyd edək ki, oktyabrın 17-də keçiriləcək “Qarabağ” - “Qəbələ” matçı saat 16:00-da başlayacaq.
