Almaniya "Bavariya”sının (Münhen) hücumçusu Mario Mandzukiç klubdan ayrılır. Sportnet.az-ın xəbərinə görə, bu barədə 28 yaşlı futbolçu "Sportske novosti”yə açıqlamasında məlumat verib.
Təcrübəli forvard baş məşqçi Xosep Qvardiolanın sisteminə uyğunlaşa bilmədiyini deyib: "Mayda klub prezidenti Karl-Haynts Rummenigge ilə danışdıq. Mənə yeni müqavilə təklif etdilər. "Bavariya”dakı karyeram fantastikdir. Son günlərə qədər ayrılmağı heç düşünməmişdim. Xüsusilə də, belə bir vaxtda ayrılmağı düşünməzdim. Ancaq, düzünü desəm, Qvardiolanın "Bavariya”da tətbiq eləməyə çalışdığı system mənə uyğun gəlmir. Bu oyun sistemində bacarığımı tam olaraq ortaya qoya bilmirəm. Belə olanda da özümü çox pis hiss edirəm və hər iki tərəf üçün də ən doğrusunun komandadan ayrılmaq olduğuna dair qərar verdim”.
Qeyd edək ki, Xorvatiya millisinin də üzvü olan Mandzukiç 2012-ci ildən "Bavariya”da çıxış edir.
