AVRO-2016-nın seçmə qrup mərhələsində Azərbaycan millisinin Xorvatiya yığması ilə keçirəcəyi ev oyunu ilə əlaqədar "Bakcell Arena” təmirə bağlanacaq. Sportnet.az-ın məlumatına görə, bununla əlaqədar "Neftçi” klubu Peşəkar Futbol Liqasına (PFL) müraciət edərək, Premyer Liqanın III turunda "Sumqayıt"la ev oyununu İsmət Qayıbov adına Bakıxanov qəsəbə stadionunda keçirilməsinə icazə istəyib.
Xahişi nəzərə alan PFL "Neftçi” – "Sumqayıt” matçının məkanını və vaxtını dəyişib. Oyun "Bakcell Arena”da deyil, İsmət Qayıbov adına Bakıxanov qəsəbə stadionunda reallaşacaq. Görüş 23 avqust saat 18:30-da başlanacaq.
Qeyd edək ki, "Bakcell Arena" bu gün "Qəbələ" və Yunanıstan "Panatinaikos"u arasında keçiriləcək Avropa Liqasının ilk "pley-off" matçından sonra təmirə bağlanılacaq.
