"Qələbə qazanmaq istəyirdik. Amma gənclərlə oynadığımızdan, bunun çətin olacağını bilirdik". Sportnet.az-ın məlumatına görə, bunu "CBC Sport"a açıqlamasında "Xəzər Lənkəran"ın baş məşqçisi Yunis Hüseynov deyib.
50 yaşlı mütəxəssis Azərbaycan Premyer Liqasının III turunda "Rəvan"la 1:1 hesablı heç-heçəyə 2 qırmızı vərəqə almalarının da təsir etdiyini bildirib: "Elşən Rzazadə və Adrian Skarlatake qırmızı vərəqə almasaydılar, nəticə fərqli ola bilərdi".
Hüseynov növbəti tur "Qarabağ"la oyunda yeni transferlərin komandaya qoşulmasından sonra Rzazadə və Skarlatake itkisinin hiss olunmayacağına ümid etdiyini vurğulayıb: "Yeni transferlərimiz çalışarlar ki, cəzalıları layiqincə əvəz edə bilsinlər. Yalan danışa bilmərəm: ilk 3 turdan elə 5 xal planlaşdırmışdım. Amma "Sumqayıt"ı uda bilərdik, bu oyunun sonlarında qələbəyə yaxın idik".
