"Gizlətmirəm, son matçımızda fərqlənə bildiyim üçün çox xoşbəxtəm. "Qəbələ"nin qapısına vurduğum qol əhval-ruhiyyəmi yüksəltdi". Sportnet.az-ın məlumatına görə, bunu "Krasnodar"ın futbolçusu Vanderson "Ufa" ilə Rusiya Premyer Liqasının XI tur matçından öncə klubun rəsmi saytına açıqlamasında deyib.
Onun fikrincə, Avropa Liqasının qrup mərhələsinin II turunda "qırmızı-qaralar" üzərində əldə etdikləri 2:1 hesablı qələbə bütün komandaya müsbət emosiya bəxş edib. Braziliyalı hücumçu "Ufa" ilə qarşılaşmada da eyni ruhda davam etmələrinin gərəkliyini vurğulayıb: "Hazırda "Krasnodar"a Rusiya çempionatında xallar çox lazımdır. Biz də meydana yalnız bir məqsədlə - qələbə üçün çıxacağıq".
Qeyd edək ki, oktyabrın 4-də keçiriləcək "Ufa" - "Krasnodar" matçı Bakı vaxtı ilə saat 18:00-da başlanacaq. Vanderson "Qəbələ" ilə görüşdə ilk qolun müəllifi olub.
