Azərbaycan milli komandasının baş məşqçisi Robert Prosineçki Bolqarıstanla AVRO-2016-nın seçmə qrup matçı üçün start heyəti açıqlayıb. Sportnet.az-ın məlumatına görə, xorvatiyalı mütəxəssis Sofiyada keçirdiyi mətbuat konfransında ilk "11-liy"i müəyyənləşdirdiyini bildirib.
O, ilk dəqiqələrdən Kamran Ağayev, Məhəmməd Mirzəbəyov, Ruslan Abışov, Maksim Medvedev, Rəşad Sadıqov, Qara Qarayev, Rahid Əmirquliyev, Dmitri Nazarov, Əfran İsmayılov, Elnur Cəfərov və Ruslan Qurbanova şans verəcəyini söyləyib. İtaliya ilə qarşılaşmada meydana çıxmış heyətlə müqayisədə Məhəmməd Mirzəbəyov, Ruslan Abışov və Elnur Cəfərov ilk 11-lik"də yer alacaq. Abışov cəzalı Bədavi Hüseynovu, Mirzəbəyov Arif Daşdəmirovu, 18 yaşlı Cəfərov isə Eddi İsrafilovu əvəzləyəcək.
Qeyd edək ki, oktyabrın 13-də Vasil Levski stadionunda keçiriləcək Bolqarıstan - Azərbaycan matçı Bakı vaxtı ilə saat 23:45-də başlanacaq.
