Avropa Liqasının qrup mərhələsində mübarizə aparan "Qarabağ" klubunun "Monako" ilə oyun üçün səfər planı məlum olub. Sportnet.az-ın məlumatına görə, klubun baş meneceri Asif Əsgərov "Report"a açıqlamasında komandanın oktyabrın 20-də yola düşəcəyini bildirib.
Ağdam təmsilçisini Monakoya aparacaq təyyarə Heydər Əliyev adına Hava Limanından saat 18:00-da hərəkət edəcək. Qurban Qorbanovun rəhbərlik etdiyi komanda çarter reysi ilə birbaşa Monakoya uçacaq.
Geri dönüş isə oktyabrın 22-də keçiriləcək oyundan sonraya planlaşdırılıb.
Qeyd edək ki, oktyabrın 22-də keçiriləcək "Monako" - "Qarabağ" qarşılaşması Bakı vaxtilə saat 22:00-da start götürəcək. Oyun II Lui stadionunda keçiriləcək.
