Yunanıstan Super Liqasının XI turunda "Panetolikos"la etdiyi heç-heçə PAOK-un futbolçusu Robert Makı xeyli məyus edib. Sportnet.az-ın məlumatına görə, 24 yaşlı yarımmüdafiəçi deməyə söz tapmadığını bildirib.
Slovakiyalı oyunçunun fikrincə, belə qarşılaşmalardan qalib ayrılmaq lazımdır. O, mövsümün əvvəlindəki kimi oynamadıqlarını etiraf edib: "Biz böhrandayıq. Bu, oyunumuza da təsir edib. Mövsümün əvvəlindəki kimi oynamırıq. Bir komanda kimi çıxış etməliyik".
Mak vəziyyətdən çıxış üçün noyabrın 26-da Avropa Liqası matçında "Qəbələ"ni yenmələrinin gərəkliyini vurğulayıb.
PAOK Super Liqada 11 turdan sonra 16 xalla 6-cı pillədə qərarlaşıb. "Panetolikos" isə heç-heçə sayəsində xallarını 12-yə çatdıraraq, 10-cu pilləyə yüksəlib. Üzləşdikləri vəziyyət Saloniki klubunun sahibi İvan Savvidinin də əhvalını pozub. PAOK-un əsas səhmdarı qarşılaşmadan sonra yaxın tərəfdaşları ilə əlaqə saxlayaraq, klubda köklü dəyişiklik etmək istədiyini bildirib.
Qeyd edək ki, Saloniki şəhərindəki "Tumba" stadionunda keçiriləcək PAOK - "Qəbələ" matçı noyabrın 26-da yerli vaxtla saat 22:05-də (Bakı vaxtı ilə 27 noyabr saat 00:05-də) başlanacaq.
