Çempionlar Liqasında son turun ilk oyun günündə 4 qrupdan 1/8 finala yüksələn və mübarizəni Avropa Liqasının 1/16 finalında davam etdirəcək komandalar müəyyənləşib. Sportnet.az-ın məlumatına görə, gecənin sensasiyası İngiltərə "Mançester Yunayted"inin Almaniya "Volfsburq"una uduzaraq, qitənin ən nüfuzlu klub turnirində mübarizəni dayandırması olub.
Əvəzində Rusiya MOİK-ini yenən Hollandiya PSV-si B qrupunun lideri "Volfsburq"la birgə 1/8 finala yüksəlib. "Qırmızı şeytanlar" isə Avroliqaya enib. Türkiyə təmsilçisi "Qalatasaray" da C qrupunda 3-cü olub. Amma "sarı-qırmızılar" son turda Qazaxıstan "Astana"sı ilə ev oyununda çətinliklə xal qazana biliblər. Bu qrupdan İspaniya "Atletiko"su ilə Portuqaliya "Benfika"sı Çempionlar Liqasında yoluna davam edəcək.
A qrupunda "Real Madrid" İspaniyada İsveç "Malmö"sünə divan tutub. 8 cavabsız qoldan 4-ünü Kriştianu Ronaldu, 3-ünü Kərim Benzema vurub. PSJ isə Fransada Ukrayna "Şaxtyor"unu yenib. 2 qoldan birini Zlatan İbrahimoviç vurub. Hər iki qalib komanda 1/8 finala adlayıb. "Şaxtyor" isə 3-cü yerin sahibi kimi Avroliqada oynayacaq.
Nəhayət, D qrupunda İngiltərənin daha bir komandası "Mançester Siti" elə Almaniyanın digər təmsilçisi "Borussiya" (Mönhenqladbax) üzərində qələbəyə nail olub. Bununla da şəhərlilər qrup lideri kimi 1/8 finala çıxıblar. İkinci vəsiqəyə İspaniyada "Sevilya"ya uduzmasına baxmayaraq, İtaliya "Yuventus"u yiyələnib. Avroliqanın son qalibi "Sevilya" isə yenə elə eyni turnirdə titulunu qorumağa çalışacaq.
PREVYU
Bu gün Çempionlar Liqasının qrup mərhələsinin son turunun oyunlarına start veriləcək. Sportnet.az-ın məlumatına görə, ilk oyun günündə qitənin ən nüfuzlu klub turnirinin 1/8 final mərhələsinə 2 vəsiqənin sahibi müəyyənləşəcək.
Bu, B qrupunun qarşılaşmalarından sonra bəlli olacaq. Bu qrupda 3 komandanın mərhələ şansı qalır. 9 xalla qrup lideri olan Almaniya "Volfsburq"u 1 xal üstələdiyi İngiltərə "Mançester Yunayted"ini qəbul edəcək. Qələbə qazanan tərəf qrup lideri kimi "16-lığ"a daxil olacaq. Digər görüşdə isə Hollandiyanın PSV və Rusiyanın MOİK klubları üz-üzə gələcək. PSV Çempionlar Liqasında yoluna davam etmək üçün mütləq qələbə qazanmalıdır. Heç-heçə Hollandiya təmsilçisini 3-cü yerin sahibi kimi Avropa Liqasına göndərəcək. İlk 2 pillədən əlini üzən MOİK isə qələbə qazanacağı təqdirdə, Avroliqada yoluna davam edəcək.
Digər 3 qrupda isə artıq 1/8 finala vəsiqələrin sahibləri müəyyənləşib. A qrupunda aktivində 13 xal olan İspaniya "Real Madrid"i və 10 xala malik Fransa PSJ-si qitənin ən nüfuzlu klub turnirində yoluna davam edəcək. İsveçin "Malmö" və Ukraynanın "Dinamo" klubları isə 3-cü pillənin sahibi kimi Avropa Liqasına vəsiqə qazanmaq üçün vuruşacaqlar. Komandaların aktivində 3 xal var. "Şaxtyor" PSJ-nin, "Malmö" isə "Real Madrid"in qonağı olacaq.
C qrupunda ilk 2 pillənin sahibləri İspaniya "Atletiko"su ilə Portuqaliya "Benfika"sının aktivində 10 xal var. Qrup liderləri Portuqaliyada üz-üzə gələcəklər. "Qalatasaray" və Qazaxıstanın "Astana" klubları isə 3-cülük üçün mübarizə aparacaq. Qrup mərhələsinin son görüşündə "sarı-qırmızılar"a Avropa Liqasına getmək üçün heç-heçə də kifayət edirsə, "Astana" mütləq 3 xal qazanmalıdır.
D qrupunda isə Almaniyanın "Borussiya" (Münxenqladbax) klubunu qəbul edəcək "Mançester Siti" (İngiltərə) Çempionlar Liqasında yoluna davam edəcək. İspaniyada "Sevilya"nın qonağı olacaq İtaliya "Yuventus"u da 1/8 finala vəsiqəni təmin edib. İki oyunun nəticəsindən asılı olaraq bu qrupda Avropa Liqasına yollanacaq komanda müəyyənləşəcək.
NƏTİCƏLƏR
Çempionlar Liqası, qrup mərhələsi, VI tur
8 dekabr
A qrupu
23:45. PSJ (Fransa) - "Şaxtyor" (Ukrayna) - 2:0
Qollar: Lukas, 57. Zlatan İbrahimoviç, 86
Baş hakim: Entoni Teylor (İngiltərə)
Paris. "Park de Prens" stadionu
23:45. "Real Madrid" (İspaniya) - "Malmö" (İsveç) - 8:0
Qollar: Kərim Benzema, 12; 24; 74. Kriştianu Ronaldu, 39; 47; 50; 59. Mateo Kovaçiç, 70
Baş hakim: Danielo Orsato (İtaliya)
Madrid. "Santyaqo Bernabeu" stadionu
Xal durumu: "Real Madrid" - 16, PSJ - 13, "Şaxtyor" - 3, "Malmö" - 3.
B qrupu
23:45. PSV (Hollandiy) - MOİK (Rusiya) - 2:1
Qollar: Luk de Yonq, 78. Davi Pröpper, 86 - Sergey İqnaşeviç, 76-penalti ilə
Baş hakim: David Fernandes Borbalan (İspaniya)
Eynhoven. "Filips" stadionu
23:45. "Volfsburq" (Almaniya) - "Mançester Yunayted" (İngiltərə) - 3:2
Qollar: Naldo, 13; 84. 29 - Antoni Martial, 10. Josuha Gilavogi, 82 - öz qapısına
Baş hakim: Milorad Majiç (Serbiya)
Volfsburq. "Folksvagen Arena"
Xal durumu: "Volfsburq" - 12, PSV - 10, "Mançester Yunayted" - 8, MOİK - 4.
C qrupu
23:45. "Benfika" (Portuqaliya) - "Atletiko" (Madrid, İspaniya) - 1:2
Qollar: Kostas Mitroğlu, 75 - Saul Niques, 33. Lusiano Vietto, 55
Baş hakim: Ovidiu Alin Xetseqan
Lissabon. "Eştadiu da Luj" stadionu
23:45. "Qalatasaray" (Türkiyə) - "Astana" (Qazaxıstan) - 1:1
Qollar: Selçuk İnan, 64 - Patrik Tvumasi, 62
Baş hakim: Kreyq Tomson (Şotlandiya)
İstanbul. Ali Sami Yen stadionu
Xal durumu: "Atletiko" - 13, "Benfika" - 10, "Qalatasaray" - 5, "Astana" - 4.
D qrupu
23:45. "Mançester Siti" (İngiltərə) - "Borussiya M" (Almaniya) - 4:2
Qollar: David Silva, 16. Rahim Sterlinq, 80; 81. Vilfrid Boni, 85 - Yulian Korb, 19. Raffael, 43
Baş hakim: Danni Makkeli (Hollandiya)
Mançester. "Etihad" stadionu
23:45. "Sevilya" (İspaniya) - "Yuventus" (İtaliya) - 1:0
Qol: Fernando Lyorente, 65
Baş hakim: Şimon Marçinyak (Polşa)
Sevilya. "Ramon Sançes Pisxuan" stadionu
Xal durumu: "Mançester Siti" - 12, "Yuventus" - 11, "Sevilya" - 6, "Borussiya" - 5.
Qeyd edək ki, Çempionlar Liqasının qrup mərhələsini bu gün keçiriləcək 8 oyunla yekun vurulacaq.
