Bu gün futbol üzrə Azərbaycan Premyer Liqasında 2015-ci ilin son oyunları keçirilib. Sportnet.az-ın məlumatına görə, II dövrə və XVIII turun son qarşılaşmaları Gəncədə və Bakıda baş tutub.
"Nizami yurdu"nda "Kəpəz" "Neftçi"ni, paytaxtda AZAL "Zirə"ni, "İnter" isə "Xəzər Lənkəran"ı qəbul edib. Gəncədəki qarşılaşmada 25 xala malik meydan sahibləri qalib gəlsələr, hətta 3-cü pilləyə yüksələ bilərlər. Amma 27 xalla 4-cü pillədə olan "bankirlər" də bunun üçün 12 xalı olan cənublulara yenilməlidirlər. "Xəzər Lənkəran" mövsümün ilk matçında "İnter"i öz meydanında məğlub etməyi bacarıb. Amma hazırda böyük hissəsi gənclərdən ibarət Yunis Hüseynovun komandası üçün bu, real görünmür. Hətta sensasiyanı gerçəkləşdirsə belə, "ağ-yaşıllar" 9-cu pillədən qurtula bilməyəcəklər. Hüseynovun rəqib həmkarı Zaur Svanadze isə ikinci pilləni hədəfləyib. Bunun üçün "Xəzər Lənkəran"ı yenmək və "Zirə"nin son zamanlar yaxşı formada olan AZAL-la səfər matçında xal itirməsinə ümid etmək lazımdır. 23 xalla 6-cı pillədə olan "Neftçi" isə yalnız qələbə təqdirində, bir pillə irəliləyərək, "Kəpəz"i arxada qoyacaq.
Azərbaycan Premyer Liqasının iki ən titullu komandası indiyədək 40 dəfə üz-üzə gəlib. Bunlardan 15-də "Kəpəz", 19-da "Neftçi" qalib gəlib, 6 matçda qalib müəyyənləşməyib. Topların nisbəti də qonaqların xeyrinədir - 36:62. Rəqiblər 34 aydan sonra Gəncədə qarşılaşacaqlar. Bu matçda vurulacaq 2-ci qol komandaların duellərində 100-cü olacaq. "Neftçi” 8 matçdır rəqibinə uduzmur. "Kəpəz” son qələbəsini 10 il əvvəl qazanıb.
20 dekabr (bazar)
14:00."Kəpəz” – "Neftçi” - 1:1
Qollar: Tərlan Quliyev 15 - Cavid İmamverdiyev, 47
Qırmızı vərəqələr: Aylton, 50 ("Neftçi") - Tural Nərimanov, 51
Hakimlər: Ömər Paşayev, Mehman Mahmudov, Akif Əmirəli, Elman Musayev
Əlavə köməkçi hakimlər: Elvin Əsgərov, Orxan Məmmədov
AFFA nümayəndəsi: Namiq Məstanov
Hakim-inspektor: Kərim Ağayev
Gəncə şəhər stadionu, 14:00
15:00. AZAL – "Zirə” - 1:0
Qol: Tagim Novruzov, 14-penalti ilə
Hakimlər: Rəhim Həsənov, Nahid Əliyev, Azər Əsgərov, Mahir Məmmədov
AFFA nümayəndəsi: Vaqif Davudov
Hakim-inspektor: Gülağa Cabarov
Bakı, "AZAL Arena"
16:30. "İnter” – "Xəzər Lənkəran” - 2:0
Qol: Zurab Xizanişvili, 28. Elnur Abdullayev, 47
Hakimlər: İnqilab Məmmədov, Namiq Hüseynov, Vüsal Qənbərov, Coşqun Həsənov
Əlavə köməkçi hakimlər: Əliyar Ağayev, Rəvan Həmzəzadə
AFFA nümayəndəsi: Elbrus Abbasov
Hakim-inspektor: Asim Xudiyev
