"Komandamın ünvanına yalnız xoş sözlər deyə bilərəm. Çox çalışdıq, yaxşı oynadıq və qələbə qazandıq". Sportnet.az-ın məlumatına görə, bunu Topaz Premyer Liqasının II turunda "Araz Naxçıvan”ı minimal hesabla yenən "Qəbələ"nin baş məşqçisi Dorinel Muntyanu deyib.
Bununla yanaşı, rumıniyalı mütəxəssis ikinci hissədə müdafiəyə çəkilmələrindən narazılığını gizlətməyib: "İlk hissənin başlanğıcında rəqibə daha rahat oynamağa imkan verdik. Lakin qol vurduqdan sonra komanda öz oyununu göstərməyə başladı, ikinci qolu da vurub oyunda nöqtəni qoya bilərdik. Təəssüf ki, bunu bacarmadıq. İkinci hissədə hesabı qoruduğumuz üçün müdafiəyə çox çəkildik. Bununla bağlı komanda ilə söhbət edəcəyəm”.
