"Xüsusilə, ikinci hissədə nümayiş etdirdiyi futbola görə komandaya təşəkkür düşür. Çox güclü rəqibə qarşı 82-ci dəqiqəyə qədər bərabər səviyyədə oynaya bildik". Sportnet.az-ın məlumatına görə, bu sözləri 21 yaşadək futbolçulardan ibarət Azərbaycan millisinin baş məşqçisi Bernhard Lippert millimizin Portuqaliya yığması ilə Avropa çempionatının seçmə mərhələsində keçirdiyi son seçmə oyundan sonra deyib.
Almaniyalı mütəxəssis komandasının oyunundan razı qalsa da, hakimliydən narazı qaldığını bildirib: "Uşaqlar əllərindən gələni etdilər. Əlbəttə, əsas milliyə gedən beş futbolçunun olmaması özünü göstərdi. Son iki matçda futbolçuların oyunu, mübarizə əzmi, əzmkarlığı qarşısında deməyə söz tapmıram. Portuqaliyalı həmkarım da oyundan sonra mənə yaxınlaşıb burada ən güclü müqavimət göstərən komandanın Azərbaycan yığması olduğunu bildirdi. Hakimlik barədə danışmağı xoşlamıram, lakin referi bizim buradan xalla qayıtmamağımız üçün əlindən gələni elədi. Çoxlu şübhəli qərarlar verdi. Nədənsə, şübhəli qərarlar ancaq bizim əleyhimizə olurdu. Onu da deyim ki, U-21-də əsas komandaya layiq futbolçular yenə var”.
Qeyd edək ki, millimiz dünən keçirilən oyunda səfərdə portuqaliyalı həmyaşıdlarına 1:3 hesabı ilə məğlub olub. Oyunun sonlarında isə yığmamızdan 2 futbolçu qırmızı vərəqə ilə cəzalanıb.
