"Xəzər Lənkəran"ın ötən gün "Dalğa Arena"da keçirilən məşqinə Əfran İsmayılov qatılmayıb. Sportnet.az-ın klubun rəsmi saytına istinadən məlumatına görə, hazırda zədəli olan İsmayılovun 3 gündən sonra komandanın məşq prosesinə qoşulacağı gözlənilir.
Ağabala Ramazanov, Alfred Sanko, Uğur Pamuk və Cahangir Həsənzadə isə fərdi qaydada çalışıb. Yay transfer pəncərəsi dövründə transferə çıxarılmış, sonradan isə müəyyən səbəblərdən komandanın düşərgəsindən kənarda qalan xorvat qapıçı Vyekoslav Tomiç də komandaya qoşulub.
Qeyd edək ki, bu gün saat 16:00-da "AZAL Arena"da "Xəzər Lənkəran" AZAL-la yoxlama oyunu keçirəcək.
