Markinyos: “Həyatım boyu belə şey görməmişdim” - MÜSAHİBƏ

"Qəbələ”nin braziliyalı yarımmüdafiəçisi Markinyos Kariokanın sportnet.az-a müsahibəsi

- Premyer Liqanın XIII turunda doğma azarkeşləriniz önündə "Simurq”a 2:3 hesabı ilə uduzdunuz. Oyununuz niyə alınmadı?
- Bu mövsüm "Qəbələ” özünü yaxşı tərəfləri ilə də göstərə bilib. Amma əsas olan qalib gəlmək və xal toplamaqdır. "Simurq”la qarşılaşmada da pis oynadığımızı düşünmürəm. Qalib də gələ bilərdik. Rəqibin vurduğu ilk qoldan sonra meydanda mübarizə daha da qızışdı. İlk hissədə hesabı bərabərləşdirə bildik. Buna baxmayaraq, ikinci hissədə buraxdığımız ani səhvlərdən qapımızda qol gördük. Əlimizdən gələni etsək də, uduzduq. Evdə məğlub olacağımızı gözləmirdim. Təəssüf ki, vacib 3 xal itirdik. Amma artıq nəticəni dəyişə biləcək nəsə yoxdur.

- "Qəbələ”də sənin oyunun niyə istənilən kimi alınmır?
- Hələ kluba tam uyğunlaşa bilməmişəm. Uzun müddətdir ki, özümü fiziki cəhətdən də yaxşı hiss etmirdim. Bəzi oyunlarda yaxşı oynayırsan, bəzilərində isə oyunun alınmır.

- Qarşıdan "Neftçi” və "Xəzər Lənkəran”la çətin səfər matçları var. Ardıcıl 3 oyunda xallar itirirsiniz. Psixoloji cəhətdən bu matçlara hazırlaşa biləcəksiniz? Ümumiyyətlə, belə oyunla komanda çempionatda nəyə nail ola bilər?
- Bu mövsüm əlimizdən gələni edəcəyik ki, yaxşı nəticə qazanaq. Əsas odur ki, bundan sonra daha yaxşı məşq edək. Addım-addım işimizi görməliyik. Başımızı aşağı salıb, qarşıdan gələn oyunlara yaxşı hazırlaşmalı və uğur qazanmalıyıq.

- Braziliyada "Parana” və Rumıniyada "Otselul” klublarının şərəfini qorumusan. İndi 6 aya çatır ki, "Qəbələ”də çıxış edirsən. Azərbaycan futbolu haqda fikirlərin necədir?
- Azərbaycan çempionatı güclü birincilikdir. Bəzi komandalarda səviyyəli oyunçular da var. Amma biz yalnız öz komandamız haqda düşünürük.

- Amma yəqin ki, Braziliya və Rumıniyada "Araz-Naxçıvan” kimi bir komandanın çempionatı yarımçıq dayandırması halı ilə rastlaşmamışdınız…
- Yox, mən həyatım boyu belə şey görməmişdim ki, hansısa klub çempionatın ortasında mübarizədən çəkilsin.

- "Simurq”a məğlubiyyət sizin çempionluq iddianıza son qoymadı ki?
-Yox, bizim çempion olmaq üçün potensialımız var. Qarşıda hələ çox oyun var.

- Bu oyundan sonra keçirilən mətbuat konfransında baş məşqçiniz Dorinel Muntyanu qeyd etdi ki, start heyətini müəyyənləşdirməkdə səhv edib. Siz də start heyətində yer almışdınız və 79-cu dəqiqədə 2-ci qolunuzun müəllifi Bəxtiyar Soltanovla əvəzləndiniz. O məhz sizi nəzərdə tuta bilər?
- Bunu mən deyə bilmərəm. Məşqçinin fikri belədirsə, özü də kimi və ya kimləri nəzərdə tutduğunu deyə bilər. Onun işinə qarışa bilmərəm. Bütün qərarları o verir.

- Braziliyalı üçün Qəbələ kimi soyuq iqlimi olan yerdə oynamaq çətin olmur?
- Bildiyiniz kimi, ötən mövsüm Rumıniyanın Qalats şəhərində çıxış edirdim. Orda da buna bənzər soyuq hava vardı. Ona görə də bu soyuq iqlimə öyrəşmişəm.

- Qəbələdəki həyat tərzindən nə dərəcədə razısınız?
- İlk vaxtlar mənə burda oynamaq çətin idi. Amma get-gedə burdakı həyat şəraitinə öyrəşə bilirəm.