"Qarabağ" klubu son bir ayda Azərbaycan Premyer Liqası və Avropa Liqasında üst-üstə 5 penalti qazanıb. Sportnet.az-ın məlumatına görə, penaltilərdən 3-ü Azərbaycan Premyer Liqasının son 2 turuna təsadüf edib.
V turun "Kəpəz"lə səfər matçında Ağdam komandası 2 penaltini dəqiq yerinə yetirib. 38-ci dəqiqədə Coşqun Diniyev, 74-cü dəqiqədə isə Elvin Məmmədov dəqiq olub. Daha bir penalti isə ötən gün "Neftçi" ilə VI tur qarşılaşmasının 90+2-ci dəqiqəsində qeydə alınıb. Bu dəfə Riçard Almeyda hədəfdən yayınmayıb.
Almeyda Avropa Liqasının "pley-off" mərhələsində İsveçrə "Yanq Boyz"u ilə cavab görüşünün 4-cü və qrup mərhələsinin ilk turunda İngiltərə "Tottenhem"i ilə matçın 7-ci dəqiqəsində penaltiləri dəqiq yerinə yetirib.
Hesabat dövründə "Qarabağ" 5 oyun keçirib. Bunlardan 3-ü Premyer Liqa, 2-si Avroliqa matçlarına təsadüf edib. 5 qarşılaşmada Ağdam komandası üst-üstə 9 qol vurub. Qolların 5-i Premyer Liqada, 4-ü Avroliqada qeydə alınıb. Eyni zamanda, qolların yarıdan çoxu məhz penaltidən vurulub.
5 oyuna 5 penaltinin təyin olunması "Qarabağ"ın hər matçda ən asan yolla fərqlənmək imkanı qazandığını göstərir.
Ümumiyyətlə, "Qarabağ" 31 gün ərzində, yəni 27 avqust - 26 sentyabr aralığında keçirdiyi 5 oyunun 4-də penalti qazanıb. 11 metrlik cərimə zərbəsinin təyin olunmadığı yeganə görüş IV turun "Xəzər Lənkəran"la ev oyununa təsadüf edib ki, bu boşluq da növbəti tur "Kəpəz"lə səfər matçında 2 penalti ilə doldurulub. Bu zərbələrin heç biri hədəfdən yan keçməyib. 5 zərbədən 3-ünü Riçard Almeyda, qalanlarını Coşqun Diniyevlə Elvin Məmmədov yerinə yetirib.
"Qarabağ"ın son bir ayda qazandığı penaltilər:
27 avqust. Avropa Liqası. "Pley-off". Cavab oyunu. "Qarabağ" - "Yanq Boyz" (İsveçrə) - 3:0. Riçard Almeyda, 4-penalti ilə
12 sentyabr. Premyer Liqa. IV tur. "Qarabağ" - "Xəzər Lənkəran" - 1:0
17 sentyabr. Avropa Liqası. Qrup mərhələsi. I tur. "Tottenhem" (İngiltərə) - "Qarabağ" - 3:1. Riçard Almeyda, 7-penalti ilə
20 sentyabr. Premyer Liqa. V tur. "Kəpəz" - "Qarabağ" - 2:3. Coşqun Diniyev, 38. Elvin Məmmədov, 74-hər ikisi penalti ilə
26 sentyabr. Premyer Liqa. VI tur. "Qarabağ" - "Neftçi" - 1:1. Riçard Almeyda, 90+2-hər ikisi penalti ilə
