Azərbaycan milli komandasının Xorvatiya yığmasına 0:6 hesabı ilə uduzduğu AVRO-2016-nın seçmə qrup matçını İngiltərə "Arsenal"ının baş məşqçisi Arsen Venger də izləyib. Sportnet.az-ın "Daily Mail"ə istinadən məlumatına görə, fransalı mütəxəssis meydan sahiblərinin futbolçusu Martselo Brozoviçi gözaltı edib.
22 yaşlı yarımmüdafiəçi ilk yarının uzatma dəqiqəsində 4-cü topu millimizin qapısından keçirib. Zaqreb "Dinamo"suna məxsus Brozoviçin oyunu Vengeri məmnun edib. Artıq "Arsenal"ın qış transfer dövründə gənc futbolçunu heyətinə qatması istiqamətində "Dinamo" ilə danışıqlara başladığı bildirilir.
Qeyd edək ki, oktyabrın 13-də keçirilmiş Xorvatiya - Azərbaycan matçında meydan sahibləri böyük hesabla qalib gəlib - 6:0. Bu məğlubiyyətdən sonra Berti Foqts millimizin baş məşqçi postundan istefa verib.
