AFFA rəhbərliyi noyabrın 16-da Azərbaycan millisinin Norveçlə "Bakcell Arena"da keçirəcəyi AVRO-2016-nın seçmə qrup matçına azarkeş cəlb etmək üçün qeyri-adi üsula əl atıb. Sportnet.az-ın əldə etdiyi məlumatına görə, qarşılaşma üçün biletlərin Tofiq Bəhramov adına Respublika stadionunun da kassalarında satışa çıxarılması qərara alınıb.
Məqsəd isə bilet satışının "Qarabağ"ın Ukrayna "Dnepr"i ilə noyabrın 6-da keçirəcəyi Avropa Liqası matçına paralel aparılmasından ibarətdir. Yəni, Respublika stadionunun kassalarından Avroliqa oyununa bilet alanlar qonşu kassada millimizin Norveçlə qarşılaşmasına biletin satıldığını görsünlər və ora da yaxınlaşsınlar. AFFA-da ehtiyat edirlər ki, yığmamızın son uğursuzluqları səbəbindən skandinaviyalılarla matça gələn az olar. Hətta "Bakcell Arena"nın cəmi 11000 tamaşaçı tutumuna malik olması belə, tribunaların dolacağına əminlik yaratmır. Əvəzində "Dnepr"lə oyunda "Qarabağ"a azarkeşlik etməyə gələnlərin hətta 30 minlik Respublika stadionuna sığmayacağı dəqiqdir. Ona görə də AFFA rəhbərliyi biletləri "Qarabağ"ın oyununa satışın başladığı gündən kassalara göndərmək niyyətindədir.
Xəbəri Sportnet.az-a açıqlamasında mərkəzi arenanın direktoru Akif İsmayılov da təsdiqləyib. O bildirib ki, AFFA-dan zəng edərək, "Qarabağ"ın biletlərinin nə zaman satışa çıxarılacağını soruşublar. Eyni zamanda, Respublika stadionunun kassalarından birinin millimizin oyununa bilet satışı üçün ayrılması xahiş olunub. İsmayılov isə bu xahişi müsbət cavablandırıb.
Qeyd edək ki, həm "Qarabağ" - "Dnepr", həm də Azərbaycan - Norveç matçları saat 21:00-da başlanacaq.
