"Barselona" klubunun futbolçusu Lionel Messi İspaniya çempionatında 59 ildir davam edən qol sayı rekordunu təzələyib. Sportnet.az-ın məlumatına görə, argentinalı hücumçu "Sevilya"nı 5:1 hesabı ilə yendikləri matçda het-trik edərək, qollarının sayını 253-ə çatdırıb.
Messiyə bu qədər qol vurmaq üçün 289 oyun keçirmək lazım gəlib. Əvvəlki rekord isə "Atletik"in forvardı Telmo Sarraya məxsus olub. Sarra 1940 - 1955-ci illərdə Bilbao komandasında çıxış etdiyi vaxt 277 matçda 251 dəfə fərqlənib. Əfsanəvi futbolçu 2006-cı ildə 85 yaşında ikən dünyasını dəyişib.
Qeyd edək ki, "Barselona"nın yetirməsi olan Lionel Messi əsas heyətdə 2004-cü ildə debüt edib. O, Kataloniya komandasının heyətində 6 dəfə İspaniya çempionluğu, 2 dəfə ölkə kubokunu və 3 dəfə Çempionlar Liqasını qazanıb.
