Azərbaycanı 2016-cı il Rio-de-Janeyro Yay Olimpiya Oyunlarında təmsil edən Sabah Şəriəti bürünc medal qazanıb.
Sportnet.az-ın məlumatına görə, 130 kq çəki dərəcəsində çıxış edən iranlı legioner son təsəlliverici görüşdə almaniyalı Eduard Popp üzərində təmiz qələbə qazanıb.
O, elə görüşün ilk hissəsində rəqibindən əvvəlcə 2 xal alıb, sonra isə rəqibinin kürəyini yerə sıxıb.
Qeyd edək ki, bu, Azərbaycanın güləş növündə ilk, ümumilikdə isə 3-cü medalı olub. Daha öncə cüdoçular Rüstəm Orucov (73 kq) və Elmar Qasımov (100 kq) gümüş medal qazanıb. Bundan başqa boksçu Kamran Şahsuvarlı (75 kq) yarımfinala yüksələrək, ən azı bürünc medalı təmin edib. Amma onun medalının əyarı dəqiqləşənədək, bu, medal sıralamasında əksini tapmayacaq.
-----------------------
23:24. Şəriəti bürünc medalın bir addımlığında
Azərbaycanı 2016-cı il Rio-de-Janeyro Yay Olimpiya Oyunlarında təmsil edən Sabah Şəriəti ilk təsəlliverici görüşə çıxıb.
Sportnet.az-ın məlumatına görə, 130 kq çəki dərəcəsində yer alan iranlı legionerin rəqibi venesuelalı Ervin Xose Karabalyo Kabrera olub.
Görüşün ilk hissəsində Şəriəti ardıcıl xallar qazanaraq, 6:0 hesablı qələbə qazanıb. İkinci hissədə isə o, daha 2 xal qazanaraq, sona 1 dəqiqə qalmış görüşün qalibi olub.
Şəriəti növbəti təsəlliverici görüşdə almaniyalı Eduard Poppu da yensə, bürünc medal qazanacaq.
----------------
19:35. Şəriəti də bürünc medal görüşlərində - YENİLƏNİR
Azərbaycanı 2016-cı il Rio-de-Janeyro Yay Olimpiya Oyunlarında təmsil edən daha bir yunan-Roma güləşçisi Sabah Şəriəti mübarizəyə başlayıb. Sportnet.az-ın məlumatına görə, iranlı legioner 1/8 finalda ABŞ təmsilçisi Robert Timoti Devid Smitlə üz-üzə gəlib.
Görüş Şəriətinin böyük hesablı qələbəsi ilə yekunlaşıb - 8:2. 1/4 finalda Azərbaycan güləşçisinin rəqibi türkiyəli ikiqat dünya və 5 qat Avropa çempionu Rıza Kayaalp olub. Bu dəfə Kayaalp qalib gəlib - 5:0.
Lakin türkiyəli pəhləvan finala yüksəldiyi üçün Şəriəti təsəlliverici görüşlərə qatılacaq. Bu gün saat 23:00-da başlanacaq qarşılaşmada onun rəqibi venesuelalı Ervin Xose Kabalyero Kabrera olacaq.
