Azərbaycanı Çempionlar Liqasında təmsil edən qadın voleybolçulardan ibarət "Azərreyl" klubu bu gün növbəti oyununu keçirib. Sportnet.az-ın məlumatına görə, C qrupunda II tur qarşılaşmasında rəqib Türkiyənin "Fənərbağça" klubu olub.
İstanbuldakı Burhan Felek Voleybol Salonunda keçirilmiş görüş meydan sahiblərinin asan qələbəsi ilə yekunlaşıb - 3:0. "Azərreyl" yalnız ikinci setdə rəqibinə ciddi müqavimət göstərə bilib. Qalan setlər isə "Fənər"in aşkar üstünlüyü şəraitində keçib.
Bu nəticədən sonra "Azərreyl" Türkiyə təmsilçisi ilə şərikli liderliyini əldən verib. "Fənər" isə xallarını 6-ya çatdıraraq, birinci pillədə möhkəmlənib.
Çempionlar Liqası, qrup mərhələsi, II tur
C qrupu
20:00. "Fənərbağça" (Türkiyə) - "Azərreyl" (Azərbaycan) - 2:0 (25:12, 25:19, 25:9)
Hakimlər: İvaylo İvanov (Bolqarıstan), Simyon Santi (İtaliya)
İstanbul. Burhan Felek Voleybol Salonu
"Azərreyl" növbəti oyununu fevralın 9-da keçirəcək. Bakıda baş tutacaq görüşdə rəqib Fransanın "Sent-Rafael" klubu olacaq.
