
Almaniya "Ayntraxt"ının idman direktoru Timo Hardunq UEFA Çempionlar Liqasının püşkünü dəyərləndirib.
Sportnet.az xəbər verir ki, Frankfurt klubunun rəsmisi "Qarabağ"la oyun üçün Bakıya uzun səfər edəcəklərini söyləyib.
Onun sözlərinə görə, hələ 2019-cu ildə Avropa Liqasının finalına vəsiqə qazana bilmədikləri üçün Azərbaycan paytaxtına yollanmaları alınmayıb: "Final oyunu Bakıda idi, amma biz ora gedə bilməmişdik. İndi nəhayət, Azərbaycana səfər imkanımız var. Əlbəttə, uzun və bir az yorucu səfər olacaq, amma oyunu səbirsizliklə gözləyirik və qələbə üçün əlimizdən gələni edəcəyik".
Lakin Hardunq müsahibəsində 2013/2014 mövsümündə Avropa Liqasının pley-off mərhələsində "Qarabağ"a qarşı keçirdikləri oyunları xatırlamayıb. Həmin vaxt "Qarabağ" evdə 0:2, səfərdə 1:2 hesabı ilə uduzaraq, qrup mərhələsinə vəsiqə qazana bilməyib.
Qeyd edək ki, "Ayntraxt" 2018/2019 mövsümündə Avropa Liqasının yarımfinalında İngiltərənin "Çelsi" komandası ilə qarşılaşıb. Hər iki matçın əsas vaxtı 1:1 hesablı heç-heçə ilə yekunlaşıb. "Çelsi"yə penaltilər seriyasında 4:3 hesabı ilə qalib gələrək finala yüksəlib və Bakı Olimpiya Stadionunda təşkil olunmuş həlledici qarşılaşmada "Arsenal"ı 4:1 hesabı ilə yenərək, kuboku qazanıb. Çempionlar Liqasının püşkünə əsasən, "Qarabağ" həm "Çelsi", həm də "Ayntraxt"a qarşı oyunlarını evdə keçirəcək.