2026-cı il dünya çempionatının seçmə mərhələsində növbəti oyunlar keçirilib.
Sportnet.az-ın məlumatına görə, E qrupunda yer alan Türkiyə millisi Bolqarıstanın qonağı olub.
Görüş "ay-ulduzlular"ın böyük hesablı qələbəsi ilə yekunlaşıb - 6:1.
Hesabı 11-ci dəqiqədə Arda Güler açsa da, meydan sahiblərindən Radoslav Kirilov 2 dəqiqə sonra bərabərlik qolunu vurub. 49-cu dəqiqədə bolqarıstanlı daha bir futbolçu Viktor Popov topu öz qapısına göndərib. 51-ci və 56-cı dəqiqələrdə Kenan Yıldız fərqlənərək, "dubl" edib. 65-ci dəqiqədə Zeki Çelik "ay-ulduzlular"ın 5-ci qolunu vurub. Matçda son nöqtəni isə 90+3-cü dəqiqədə İrfan Can Kahveçi qoyub.
Qrupun digər matçında lider İspaniya Gürcüstanı 2 cavabsız topla məğlub edib. Nəticədə İspaniya 9 xalla liderliyini davam etdirib, Türkiyə isə 6 xalla 2-ci pillədə qərarlaşıb. Gürcüstan 3 xalla 3-cü yerdə gedir. Bolqarıstan isə hələ də xalsızdır.
F qrupunda lider Portuqaliya evdə İrlandiyanı uzatma dəqiqələrində vurduğu qolla məğlub edib. Komandanın lideri Kriştianu Ronaldu isə penaltini dəqiq yerinə yetirə bilməyib. Öz növbəsində, Macarıstan Ermənistan üzərində inamlı qələbə qazanıb.
K qrupunda Serbiya - Albaniya görüşü təkcə turnir cədvəli baxımından deyil, siyasi cəhətdən də prinsipial xarakter daşıyıb. Qarşılaşmadan öncə Albaniya himni fitə basılıb. Bununla belə, qonaq komanda qələbə qazanmağı bacarıb və xalını 11-ə çatdıraraq, ikinci pillədə möhkəmlənib. Yeganə qolun müəllifi Rey Manay sevincini Albaniyanın simvolu olan qartal təsviri ilə nümayiş etdirib. Buna görə Manay sarı vərəqə alıb. Qrupun digər görüşündə Latviya evdə Andorra ilə bacarmayıb. Nəticədə "cırtdan ölkə" komandası ilk xalını qazanıb.
Nəhayət, I qrupunda Norveç yığması ardıcıl 6-cı qələbəsini evdə İsrail üzərində 5 cavabsız qolla qazanıb. Toplardan 3-nü Erlin Holann vurub. Qrupun digər oyununda İtaliya səfərdə Estoniyanın qapısından 3 top keçirib.
DÇ-2026, seçmə mərhələ
11 oktyabr
E qrupu
22:45. İspaniya - Gürcüstan - 2:0
22:45. Bolqarıstan - Türkiyə - 1:6
Xal durumu: İspaniya - 9, Türkiyə - 6, Gürcüstan - 3, Bolqarıstan - 0
F qrupu
20:00. Macarıstan - Ermənistan - 2:0
22:45. Portuqaliya - İrlandiya - 1:0
Xal durumu: Portuqaliya - 7, Macarıstan - 4, Ermənistan - 3, İrlandiya - 2
I qrupu
20:00. Norveç - İsrail - 5:0
22:45. Estoniya - İtaliya - 1:3
Xal durumu: Norveç - 18 (6 oyuna), İtaliya - 12 (5), İsrail - 9 (6), Estoniya - 3 (6), Moldova - 0 (5)
K qrupu
17:00. Latviya - Andorra - 2:2
22:45. Serbiya - Albaniya - 0:1
Xal durumu: İngiltərə - 15 (5 oyuna), Albaniya - 11 (6), Serbiya - 7 (5), Latviya - 5 (6), Andorra - 1 (6).
