Bu gün Azərbaycan Premyer Liqasında XXVIII turun son 2 görüşü keçiriləcək.
Sportnet.az-ın məlumatına görə, günün ilk matçı Yevlax şəhər stadionunda "Kəpəz" və debütant "İmişli" komandaları arasında gerçəkləşəcək.
Saat 15:30-da başlanacaq oyunu FIFA referisi Kamal Umudlu idarə edəcək.
Hazırda "Kəpəz" 21 xalla 10-cu, "İmişli" 26 xalla 9-cu yerdə gedir.
Bu komandalar yalnız cari mövsümdə üz-üzə gəliblər. İlk dövrədə "İmişli" səfərdə 3:0 hesabı ilə qalib gəlib. İkinci dövrədəki oyun isə qolsuz yekunlaşıb - 0:0. Beləliklə, hələ qapısından top buraxmayan "İmişli" bu göstəricidə öndədir - 3:0. “Kəpəz” isə ev oyununda xal qazanmayıb.
Turun yekun qarşılaşmasında isə "Sumqayıt" və "Qəbələ" komandaları üz-üzə gələcək. Mehdi Hüseynzadə adına Sumqayıt şəhər stadionunda keçiriləcək oyunu baş hakim Vüqar Həsənli idarə edəcək. Görüş saat 18:00-da başlanacaq.
Hazırda "Sumqayıt" 32 xalla 7-ci, "Qəbələ" 19 xalla 11-ci yerdə gedir. Komandaların əvvəlki 49 oyununun 9-da "gənclik şəhəri" təmsilçisi, 25-də "qırmızı-qaralar" qələbə qazanıb. Daha 15 matç heç-heçə ilə yekunlaşıb. Topların nisbətində də "Qəbələ"nin ciddi üstünlüyü var - 71:39. Öz aralarındakı son 6 görüşdə “Sumqayıt” uduzmayıb. “Qəbələ” axırıncı 5 matçda qol vurmayıb.
Azərbaycan Premyer Liqası, XXVIII tur
19 aprel (bazar)
15:30. “Kəpəz” – “İmişli”
Hakimlər: Kamal Umudlu, Vüsal Məmmədov, Orxan İbişov, Namiq Bəkirov
VAR: Elvin Bayramov
AVAR: Rəşad Əhmədov
Hakim-inspektor: Asim Xudiyev
AFFA nümayəndəsi: Bəhram Qurbanov
Yevlax şəhər stadionu
18:00. “Sumqayıt” – “Qəbələ”
Hakimlər: Vüqar Həsənli, Teymur Teymurov, Tərlan Talıbzadə, Rəvan Həmzəzadə
VAR: Kamranbəy Rəhimov
AVAR: Əkbər Əhmədov
Hakim-inspektor: Feyzulla Feyzullayev
AFFA nümayəndəsi: Erkin Hüseynov
Mehdi Hüseynzadə adına Sumqayıt şəhər stadionu.
