Urfan Abbasov Premyer Liqada 350-ci oyununu keçirib.
Sportnet.az PFL-in rəsmi saytına istinadən xəbər verir ki, “Araz-Naxçıvan”ın kapitanının yubileyi “Sumqayıt”la səfər matçına (1:2) təsadüf edib.
O, Azərbaycan Premyer Liqasının XXXI turunun görüşünə start heyətində çıxıb.
Abbasov 350 oyunda 8 qola imza atıb. Debütü 2011/2012 mövsümünə təsadüf edən futbolçu üç klubun formasını geyinib. O, “Qəbələ”də 248 (5 qol), “Səbail”də 47 (2 qol) və “Araz-Naxçıvan”da 55 (1 qol) oyun keçirib.
Azərbaycan çempionatları tarixinə yüksək dəstədə 350 və daha çox oyun keçirən 14-cü futbolçu kimi düşüb. O, 2025/2026 mövsümündə adı sifariş vərəqində olmuş oyunçular arasında 3-cü göstəriciyə malikdir. “Qəbələ”nin futbolçusu Asif Məmmədov 388, karyerasını mövsümün gedişində “Araz-Naxçıvan”da bitirən Qara Qarayev 360 matçın iştirakçısı olub.
