Boliviya prezidenti Evo Morales futbolçu olacaq. Sportnet.az-ın məlumatına görə, siyasətçi Boliviya çempionatının yüksək liqasında çıxış edən "Sport Boyz" klubu ilə əsl futbolçu müqaviləsi bağlayıb.
54 yaşlı ölkə rəhbəri yarımmüdafiəçi mövqeyində 10 nömrəli forma ilə çıxış edəcək. Boliviya çempionatı avqustda start götürəcək. Məhz həmin vaxt "Sport Boyz"un yeni xavbekinin futbol meydanında debütü baş tuta bilər.
Klub prezidenti Mario Kronenbold deyib ki, Moralesin futbola sevgisi var, kifayət qədər yaxşı oynayır və yaxşı da formadadır.
Moralesin müqavilə üzrə əmək haqqının ayda 213 dollar təşkil edəcəyi gözlənilir. O, yeni komandasında prezident kimi iş qrafiki imkan verən kimi mümkün qədər tez-tez oynamağı planlaşdırır.
