"Moldova ilə oyunda rəqibdən daha yaxşı oynadıq. Bunun nəticəsində daha çox qol imkanlarımız da oldu. Moldovanın zəif komanda olduğunu da demək olmaz". Sportnet.az-ın məlumatına görə, bunu "Qəbələ"nin futbolçusu Ürfan Abbasov deyib.
Moldovaya qarşı keçirilmiş yoldaşlıq oyununda debüt edən Abbasov oyunun istədikləri kimi alındığını bildirib: "Milli komandada oynamaq qürurverici hissdir. Debütümə görə mənə şans verən baş məşqçiyə təşəkkür edirəm. Moldova ilə matç yığmada ilk oyunum idi. Qarşıdakı oyunlarda etimad göstərilsə, özümü daha yaxşı göstərəcəyəm. Daim milliyə çağırılmaq üçün klubda da həmişə çıxış etmək lazımdı. Bunun üçün çox çalışmaq lazımdır. Mən də bundan sonra üzərimdə daha da çox çalışacağam".
O, Azərbaycan Premyer Liqasının ilk 12 turundakı çıxışı və noyabrın 21-də "Sumqayıt"la oyunu haqda da fikirlərini söyləyib: "Son turlarda keçirdiyimiz oyunlar istədiyimiz kimi alınmadı. Lakin qarşıdakı matçlara hazırlaşırıq. Hər qarşılaşmada yaxşı oyun göstərib, xal hesabımızı artırmağa çalışacağıq. Mövsümün ilk 12 turundakı öz çıxışıma gəlincə, tam razı deyiləm. Amma üzərimdə daha çox çalışmaqla daha da yaxşı oynamağa çalışıram. Komandamız hər görüşə qələbə üçün çıxır. "Sumqayıt"la səfər oyununa da 3 xal üçün yollanacağıq. Düşünürəm ki, rəqib meydanında yaxşı nəticə qazanarıq".
