"Maraqlı oyun alındı, "Sumqayıt” komandasına belə bir oyun təklifinə görə təşəkkür edirəm". Sportnet.az xəbər verir ki, bunu "Kəpəz"in baş məşqçisi Şahin Diniyev "Sumqayıt"la səfərdə 2:2 hesablı heç-heçəyə nail olduqları Azərbaycan Premyer Liqasının XV tur matçından sonra deyib.
Onun fikrincə, komandalardan heç biri xal itirməyiblər: "İlk hissədə bizim, ikinci hissədə "Sumqayıt”ın qol vurmaq üçün şansları oldu. Futbolçular əsl xarakter nümayiş etdirdilər. Düşünürəm ki, komandalar bu gün xal itirmədilər, xal qazandılar. Maraqlı, sürətli, ritmli bir futbol oldu. Dəyişiklik etmək baxımından ciddi imkanlarımız yoxdur. Amma Sitnikin oyuna daxil olması işimizə yaradı. Futbol təkcə gözəlliyə yox, əsasən nəticəyə hesablanmış oyundu. Bunlardan biri olanda digəri olmur. Birinci hissədə biz əks hücumlarda oynamağa çalışdıq. Bilirdim ki, "Sumqayıt” sürətli komandadır, onlara meydan versəydik, "tutulacaqdıq”. İlk hissədə hər iki komanda gözləmə mövqeyini tutdu, ikinci hissə isə tamamilə fərqli oyun oldu. İkinci hissədə hər iki komanda qələbə üçün oynadı”.
"Sumqayıt"ı maraqlı oyun münasibətilə təbrik edən Diniyev rəqibin aşağı pillələrə layiq olmadığını vurğulayıb.
