Gürcüstanlı sabiq futbolçu və UEFA-nın milli federasiyalarla əlaqə üzrə meneceri David Petriaşvilini polis maşını vurub. Sportnet.az-ın məlumatına görə, hadisə dünən axşam saatlarında Gürcüstanın paytaxtı Tiflisdə baş verib.
46 yaşlı Petriaşvili patrul maşınının zərbəsindən yerindəcə keçinib. Onun ölümü ilə bağlı "Avtomobil idarə edərkən təhlükəsizlik qaydalarının pozulması və insan ölümünə səbəb olma" maddəsi ilə cinayət işi açılıb.
Qeyd edək ki, David Petriaşvilinin atası - keçmiş futbolçu Quram Petriaşvili də 2002-ci ildə avtomobil qəzasında həyatını itirib.
