"Sumqayıt"ın heyətində güclü oyunçular var və bu komandaya qarşı oynamaq asan deyil. Çətin olacağını bilirdik. Amma qələbə qazana bildik". Sportnet.az-ın məlumatına görə, bunu "Neftçi"ın baş məşqçisi Əsgər Abdullayev Azərbaycan Premyer Liqasının XIX turunda "Sumqayıt" üzərində 1:0 hesablı qələbə qazandıqları oyundan sonra deyib.
Ə.Abdullayev komandasının hələ lazımi formada olmadığını bildirib: "Bir çox futbolçular pik nöqtəsində deyil və zədə səbəbindən məşqə az çıxanlar da var. İnanıram ki, gələcəkdə daha yaxşı oyun göstərəcəyik".
Təcrübəli mütəxəssis ölkə xaricində yox, Bakıda təlim-məşq toplanışı keçirmələrinin üstünlüyündən də danışıb: "Bakıda qalmağımızın üstün cəhəti o oldu ki, əvəzedici heyətdən oyunçuları yoxladıq. Bu baxımdan biz nəsə əldə etdik. Əlbəttə, ölkə xaricində daha güclü komandalarla oynayıb nəsə əldə etmək mümkündür. Ancaq heyətə baxdıqda görünür ki, "Neftçi" gənc komandadır. Azərbaycan futboluna bu oyunçuların köməyi olacaq və onlar milliyə də düşə biləcəklər".
"3 futbolçumuz sarı vərəqə limitini keçdiklərinə görə bu oyunu buraxdı" deyən baş məşqçi komandada güclənməyə ehtiyac duyduqları mövqeləri sadalayıb: "Fasilədə yarımmüdafiə mövqeyində kimin oynaya biləcəyini müəyyənləşdirdik. Yeni transferimiz Elşən Rzazadəni perspektivli futbolçu kimi görürəm. Onun oyununu da bəyənmişəm. Elşəndən yaxın günlərdə olmasa da, yaxın aylarda bəhrələnə biləcəyik. Bizdə hücumçu problemi var. O mövqedə Araz Abdullayevi yoxladıq, Ruslan Qurbanovdan istifadə edirik. Anyete də sırf hücumçu deyil. Bu mənada hücumçuya ehtiyacımız daha çoxdur. Bir də sol cinah müdafiəçisi mövqeyində olan futbolçu olsa, yaxşı olar".
Ə.Abdullayev Kaue Sesilio Da Silvanın komandadan göndərilməsindən xəbərsiz olduğunu da bildirib: "Kaue bu gün oyuna baxdı. Onunla klubun heç bir problemi yoxdur. Onunla yolların ayrılacağı barədə tam məlumatım yoxdur".
