"Deyərdim ki, AZAL-la oyun "Qəbələ" matçından daha çətin olacaq. Bölgə klubuna da qarşı zəif oynamadıq. Sadəcə, güclü, iddialı komandalara qarşı motivasiya başqa cür olur". Sportnet.az-ın məlumatına görə, bunu "Kəpəz"in futbolçusu Şəhriyar Əliyev klub saytına açıqlamasında deyib.
Premyer Liqanın XX turunda AZAL-la keçiriləcək oyundan danışan futbolçu bunları bildirib: "Bizim kimi onların da Avroliqaya getmək şansı var. Turnir cədvəlində də bizdən çox da uzaqda deyillər. Aramızda xal fərqi azdır. Həm biz, həm də rəqib meydana qələbə üçün çıxacaq. Onlar da səfərə xal aparmağa gələcəklər. "Qəbələ" ilə oyundakı uğurlu startımızı davam etdirmək istəyirik. Razıyam ki, bizə çox çətin olacaq. Ancaq qələbə qazanmalıyıq. Bu oyun bizə hava-su kimi lazımdır. Doğma stadion və azarkeş amili xeyrimizədir. Odur ki, məqsədimiz üç xal götürməkdir".
