Azərbaycan Premyer Liqasında XXIV turun oyunlarına start verilib. Sportnet.az-ın məlumatına görə, ilk oyun günündə 4 qarşılaşma keçirilib.
İlk olaraq "Xəzər Lənkəran" və AZAL komandaları qarşılaşıb. Lənkəran şəhər stadionunda keçirilmiş oyunda "təyyarəçilər" qələbə qazanıb. AZAL-ın yeganə qolunu matçın 36-cı dəqiqəsində Aleksandr Quruli penaltidən vurub. Qələbə sayəsində AZAL xal ehtiyatını 32-yə çatdıraraq turnir cədvəlinin 6-cı pilləsinə yüksəlib. Aktivində 14 xal olan "Xəzər Lənkəran" isə 9-cudur.
Növbəti oyunda "Neftçi" doğma azarkeşlər önündə "Qəbələ" ilə münasibətlərinə aydınlıq gətirib. "Bakcell Arena"ya toplaşmış azarkeşlər 26-cə dəqiqədə Anyetenin ifasında qol görüblər. İlk hissə "ağ-qaralar"ın qələbəsi ilə yekunlaşıb. İkinci hissəyə daha aktiv başlayan "Qəbələ" 51-ci dəqiqədə istyinə çatıb. Rafael Santos Aqil Məmmədovu məyus etməyi bacarıb. Oyunda son nöqtəni isə Rəşad Eyyubov qoyub. Qonaqların futbolçusu 90-cı dəqiqədə komandasına qələbə qazandıran topu vurub. Digərlərindən fərqli olaraq bu görüş "Neftçi"nin futbolçusu Jayro Rodrigesin qırmıı vərəqə alması və baş məşqçi Əsgər Abdullayevin istefa verməsi ilə yadda qalıb. Səfər qələbəsi "Qəbələ"nin 41 xalla turnir cədvəlinin 3-cü pilləsində möhkəmlənməsinə səbəb olub. "Neftçi" isə xalsız ayrıldığı oyundan sonra 7-ci pilləyə düşüb - 31 xal.
Günün daha bir qarşılaşması Sumqayıtda keçirilib. Sumqayıtın eyniadlı komandası "İnter"i qəbul edib. Turun ilk qarşılaşmasında olduğu kimi "Kapital bank Arena"ya da yığışan azarkeşlər bir qola şahidlik ediblər. Yalnız Nizami Hacıyev oyunun 47-ci dəqiqəsində "İnter"ə 3 xal qazandıran topu vurub. Bu oyundan sonra "İnter" 38 xalla 4-cü pillədə qərarlaşıb. "Sumqayıt" isə 22 xalla 8-ci pillədədir.
Turun mərkəzi görüşü isə "Azərsun Arena"da baş tutub. Turnir cədvəlinin vahid lideri "Qarabağ" ikinci yerdə qərarlaşan "Zirə"ni sınağa çəkib. Cari mövsümdə Premyer Liqada 14 qələbə qazanan Qurban Qurbanovun rəhbərlik etdiyi komanda öz gücünü "Zirə"yə nümayiş etdirib. Oyunun 2-ci dəqiqəsində Muarem Muarem ev sahibi azarkeşlərini sevindirib - 1:0. İlk 45 dəqiqə bu hesabla da yekunlaşıb. İkinci hissədə də meydan sahibləri aktivlik nümayiş etdirib. Nəticədə əsas vaxta əlva olunmuş 3-cü dəqiqədə Mahir Mədətov komandasının ikinci qolunu vurub və "Qarabağ" ən yaxın izləyicisi "Zirə"ni məğlub edərək liderlik mövqeyini möhkəmləndirib. Komandanın aktivində 51 xal var. "Zirə" isə 24 oyundan sonra 44 xalla turnir cədvəlinin ilkinci pilləsində qərarlaşıb.
Turun son oyunu martın 6-da keçiriləcək. "Bayıl Arena"da baş tutacaq görüşdə "Rəvan" və "Kəpəz" komandaları üz-üzə gələcək. Oyunun start fiti saat 16:00-da səslənəcək.
*****************************************
Bu gün futbol üzrə Azərbaycan Premyer Liqasında XXIV tura start veriləcək. Sportnet.az-ın məlumatına görə, turun ilk oyun günündə 4 qarşılaşma keçiriləcək.
Əvvəlcə "Xəzər Lənkəran" və AZAL komandaları üz-üzə gələcək. Lənkəranda baş tutacaq görüş hər iki komanda üçün əhəmiyyət daşıyır. Tərlan Əhmədovun rəhbərlik etdiyi komanda səfərdən 3 xalla dönəcəyi təqdirdə, xal ehtiyatını 32-yə çatdıracaq. Lənkəran təmsilçisi isə Azərbaycan Kubokunun 1/4 finalında evdə "Neftçi"ni məğlub etdikdən (3:2) sonra çempionatda da qələbə qazanmağa çalışacaq. Son 4 qarşılaşmada meydan sahibi olan komanda qalib gəlir. 9 matçdır qonaq komanda qələbə qazana bilmir. "Xəzər Lənkəran” ardıcıl 11 ev oyununda meydanı qolsuz tərk etməyib.
Növbəti görüşdə "Neftçi" və "Qəbələ" komandaları "Bakcell Arena"da münasibətlərinə aydınlıq gətirəcək. Cütlüyün görüşündə maraqlı statistika diqqəti cəlb edir. Son 8 qarşılaşmada meydan sahibi olan komanda qalib gəlməyib. Ardıcıl 4 görüşdə qonaq komanda 3 xal qazanıb. "Qəbələ" ən azı turnir cədvəlinin 3-cü pilləsinində möhkəmlənmək üçün çətin səfərdən qələbə ilə dönməlidir. Belə olarsa, "Neftçi" isə avrokubok iddialarını davam etdirmək üçün doğma azareşlər qarşısında xal itirməməlidir. Bu görüşdən sonra 3 xal meydan sahiblərinin aktivinə yazılsa, 34 xalla ən yaxın qonşusu "Kəpəz"i 1 xal qabaqlayaraq 5-ci pilləyə yüksələcək.
"Sumqayıt" "İnter"i sınağa çəkəcək. "Qəbələ" ilə üçüncülük mübarizəsi aparan "bankirlər" iddialarını davam etdirmək üçün səfərdən qələbə ilə dönməlidir. "Sumqayıt" isə AZAL-la xal fərqini azaltmaq üçün evdə məğlub olmamalıdır. Maraqlıdır ki, "İnter" bu komanda üzərində qələbəsini sonuncu dəfə 2014-cü ilin avqustunda qazanıb.
Turun mərkəzi görüşü "Azərsun Arena"da baş tutacaq. 48 xalla turnir cədvəlinin liderlik kürsüsünə əyləşən "Qarabağ" 4 xal qabaqladığı "Zirə"ni qonaq edəcək. Bu matçın Adil Şükürovun komandası üçün daha prinsipial olduğunu demək olar. "Zirə" səfərdə 3 xal qazanacağı təqdirdə "Qarabağ"la xal fərqini minimuma endirəcək. Qurban Qurbanovun rəhbərlik etdiyi komanda isə qələbə sayəsində birincilik mövqeyini möhkəmləndirəcək. Komandalar ölkə çempionatında 2 dəfə qarşılaşıb. Bu görüşlərin biri "Qarabağ"ın qələbəsi ilə yekunlaşıbsa, digərində bərabərlik qeydə alınıb - 4:1, 0:0.
Azarkeşlər turun son oyununda "Rəvan" və "Kəpəz" komandalarının oyununun şahidi olacaqlar. Turnir cədvəlinin sonuncusu xal toplayaraq özündən irəlidəki "Xəzər Lənkəran"a çatmaq istəyirsə, Gəncə təmsilçisi avrokuboka vəsiqə üçün çalışır. Cütlüyün son 3 qarşılaşmasında "Rəvan" qalib gələ bilməyib.
Azərbaycan Premyer Liqası, XXIV tur
5 mart
14:00. "Xəzər Lənkəran" – AZAL - 0:1
Qol: Aleksandr Quruli, 36 (P)
Hakimlər: Orxan Məmmədov, Elman Musayev, Mehman Mahmudov, Ziya Nəsirov
AFFA nümayəndəsi: Nüvər Xasıyev
Hakim-inspektor: Fazil Mürşüdov
Lənkəran. "Xəzər Lənkəran" mərkəzi stadionu
15:00. "Neftçi" – "Qəbələ" - 1:2
Qol: Anyete, 26 - Rafael Santos, 51. Rəşad Eyubov, 89
Qırmızı vərəqə: Jairo Rodriges Filyo, 79
Hakimlər: Ömər Paşayev, Vaqif Musayev, Akif Əmirəli, Rəhim Həsənov
AFFA nümayəndəsi: Elbrus Abbasov
Hakim-inspektor: Rövşən Əhmədov
Bakı. "Bakcell Arena" (CBC Sport)
17:00. "Sumqayıt" – "İnter" - 0:1
Qol: Nizami Hacıyev, 47
Hakimlər: Rauf Cabbarov, İsgəndər Əliyev, Nahid Əliyev, Rəvan Həmzəzadə
AFFA nümayəndəsi: Məmmədəli Məmmədov
Hakim-inspektor: Füzuli Nəcəfov
Sumqayıt. "Kapital Bank Arena"
18:00. "Qarabağ" – "Zirə" - 2:0
Qol: Muarem Muarem, 3. Mahir Mədətov, 90+3
Hakimlər: Əliyar Ağayev, Zeynal Zeynalov, Rza Məmmədov, İnqilab Məmmədov
AFFA nümayəndəsi: Ramiz Abdullayev
Hakim-inspektor: Məlik Həsənov
Bakı. "Azərsun Arena" (CBC Sport)
6 mart
16:00. "Rəvan" – "Kəpəz"
Hakimlər: Elvin Əsgərov, Rahil Ramazanov, Vüsal Qənbərov, Fariz Yusifov
AFFA nümayəndəsi: Arif Fərəcov
Hakim-inspektor: Vüsal Əliyev
Bakı. "Bayıl Arena" (CBC Sport)
