"Kəpəz" Müstəqil Fan-Klubu Azərbaycan Premyer Liqasının XXV turunda eynialdı komandanın "Xəzər Lənkəran"la keçirəcəyi oyun öncəsi qadın azarkeşlərlə bağlı müraciət ünvanlayıb. Sportnet.az-ın məlumatına görə, müraciətdə azarkeşlərdən nəzakətli olmaq və təhqirə yol verməmələri xahiş edilib.
Müraciətdə bildirilir: "Kəpəz"in ev oyunlarının əksəriyyətində xanım azarkeşlər görmək mümkündür. Xanım fanatların da komandamıza dəstək olması, klubun üzvləri kimi, biz "Kəpəz" Müstəqil Fan-Klubunu da sevindirir. Zərif cinsin nümayəndələrinin sırf Gəncə Şəhər Stadionunda olsa belə, daim komandamıza dəstəyinin şahidi olmaq üçün fan-klub olaraq, azarkeşlərdən tək ev oyunuda deyil, səfər oyunlarında da baş verən məqamlarda emosiyalara hakim olub, təhqirə yol verməmələri xahiş olunur.
Unutmayaq ki, komandamızın səfər oyunları televiziya vasitəsilə yayımlanır və xanım azarkeşlər tərəfindən izlənilir. Oyunboyu fanatların səsi şərhçilərin fonunda olsa belə, aydın eşidilir. "Kəpəz" azarkeşlərinin nüfuzuna bir qədər xələl gətirən bu cür halların Premyer Liqanın XXV turu çərçivəsində reallaşacaq "Kəpəz" - "Xəzər Lənkəran" maçtında təkrarlanmaması diləyi il hər kəsi komandamıza dəstək verməyə səsləyirik".
Qeyd edək ki, martın 13-də keçiriləcək oyun saat 15:00-da başlanacaq.
