AFFA tərəfindən Bakının "İnter" klubuna avrokuboklarda iştirak üçün lisenziyanın verilməsi komandanın gələn mövsümdən UEFA-nın bayrağı altında keçiriləcək yarışlarda iştirak edəcəyi anlamına gəlmir. Bunu Sportnet.az-a açıqlamasında klub prezidenti Rəşad Qasımov deyib.
Onun sözlərinə görə, yerli assosiasiya lisenziya versə də, avrokuboklarda iştirak üçün UEFA-nın cəzası ləğv olunmalıdır: "Bildiyimiz kimi CAS-a müraciət etmişdik və UEFA-nın cavabını gözləyirik. Mayın 20-dək futbol qurumu tərəfindən cavab veriləcək və bundan sonra avrokuboklarda iştirak edib-etməyəcəyimizə aydınlıq gələcək. AFFA-nın kluba verdiyi lisenziya cari mövsümə aiddir. Bunun köhnə borclara heç bir aidiyyatı yoxdur".
Qeyd edək ki, UEFA martın 30-da CFCB-nin İstintaq Palatasının qəbul etdiyi 10 dekabr 2015-ci il tarixli AC-05-2015 nömrəli qərarını qüvvədə saxlayaraq, "İnter" klubunu növbəti üç avrokubok mövsümündən (2016/2017, 2017/2018, 2018/2019) birində (ölkədaxili futbol mövsümünün yekun nəticələrinə görə avrokubok oyunlarına vəsiqə qazanacağı halda) iştirak hüququndan məhrum edib.
