Fransada keçiriləcək Avropa çempionatının final oyununu yayımlayacaq kanal müəyyənləşib. Sportnet.az-ın məlumatına görə, qitə turnirinin həlledici görüşü "İctimai Televiziya" vasitəsilə azarkeşlərə təqdim olunacaq.
Müqavilə şərtlərinə görə AÇ-nin Azərbaycan ərazisində əsas yayımçısı 23 oyunu canlı təqdim etmək hüququna malikdir. Buraya açılış, ¼ finalın bütün oyunları, hər iki yarımfinal və final da daxildir. Digər matçlara gəlincə, kanal hər oyun günü 1 görüşü yayımlayacaq. Gün ərzində keçiriləcək oyunların ilk seçim hüququ da "İctimai Televiziya"ya məxsusdur.
Artıq qrup mərhələsinin ilk 2 turu üçün Fransa- Rumıniya, İngiltərə-Rusiya, Türkiyə-Xorvatiya, Belçika-İtaliya, Portuqaliya-İslandiya, Fransa-Albaniya, Almaniya-Polşa, İspaniya-Türkiyə və Portuqaliya-Avstriya oyunları sifariş edilib. 3-cü tur və 1/8 final qarşılaşmaları isə çempionat zamanı hadisələrin gedişatından asılı olaraq seçiləcək. Qitə birinciliyinin digər oyunları isə "CBC Sport" telekanalı ilə təqdim olunacaq.
Qeyd edək ki, Avropa çempionatı 10 iyun - 10 iyulda keçiriləcək.
