"Qəbələ”nin məşqçilər korpusunda dəyişiklik edilib. Sportnet.az-ın məlumatına görə, ötən mövsüm Azərbaycan çempionu tituluna yiyələnən əvəzedicilərin baş məşqçisi olan Ramin Quliyev "qırmızı-qaralar"da fəaliyyətini əsas komandada davam etdirəcək.
Əvəzedicilərədək "Qəbələ" Futbol Akademiyasının aşağı yaş qruplarından olan komandalarında da çalışmış 35 yaşlı mütəxəssis baş məşqçi Roman Qriqorçukun yeni köməkçisi təyin olunub. Bunadək Qriqorçukun başçılıq etdiyi məşqçilər korpusunda yer alan Mixaylo Savka və Stepan Matveyevin "Qəbələ”dəki fəaliyyəti başa çatıb. 2015-ci ilin yanvarından klubda çalışan ukraynalı məşqçilər ailə vəziyyəti ilə əlaqədar ayrılıblar.
"Qəbələ” İdman Klubu Mixaylo Savka və Stepan Matveyevə fəaliyyətinə görə təşəkkür edir, gələcək karyerasında yeni-yeni uğurlar arzulayır.
Xatırladaq ki, Quliyev vaxtilə "Qəbələ"də oynayıb və karyerasını məhz bu klubda başa vurub.
