Amerika Kubokunun 1/4 final mərhələsinin bütün iştirakçıları müəyyənləşib. Sportnet.az-ın məlumatına görə, qrup oyunlarından sonra Braziliya, Uruqvay və Kosta-Rika kimi son dünya çempionatının iştirakçıları mübarizədən kənarda qalıb.
A qrupunda ABŞ və Kolumbiya hərəyə 6 xalla növbəti mərhələyə vəsiqə qazanıb. B qrupunun birincisi 7 xal toplayan Peru olub, ikinci pillədə isə aktivində 5 xal olan Ekvador qərarlaşıb. Yarımfinala gedən yolda ABŞ Ekvadorla, Peru isə Kolumbiya ilə qarşılaşacaq.
C qrupunda Meksika və Venesuela yığmaları hərəyə 7 xalla 1/4 finala yüksəlib. Meksikanın rəqibi 6 xalla D qrupunda ikinci yeri tutan Çili olacaq. Venesuela isə 9 xalla sonuncu qrupun lideri olmuş Argentina ilə üz-üzə gələcək.
Qeyd edək ki, oyunlar 17, 18 və 19 iyunda Bakı vaxtı ilə gecə saatlarında keçiriləcək.
