"Əsas olan nəticə deyildi, ona görə qarışıq heyətlə oynadıq. Hər hissədə meydana fərqli heyət buraxmışdıq. Oyun günü səhər fiziki məşq də etmişdik". Sportnet.az-ın məlumatına görə, bu fikirləri "Kəpəz"in baş məşqçisi Şahin Diniyev klubun rəsmi saytına açıqlamasında bildirib. Türkiyədə təlim-məşq toplanışı çərçivəsində ilk yoxlama oyununda Türkiyə Futbol Federasiyası Bölgə Karmalar (seçmə) komandası ilə qolsuz heç-heçəyə imza atan Gəncə klubu hazırlığı davam etdirir.
Dünən keçirdikləri sınaq matçı ilə bağlı fikirlərini açıqlayan Diniyev bu toplanışın əsas məqsədinin fiziki durumu yaxşılaşdırmaq olduğunu söyləyib: "Bu səbəbdən nəticə bizim üçün ön planda deyildi. Heyətin formalaşması üçün komandaya baxdım. Mənə elə gəlir ki, yorğunluğun fonunda uşaqlar pis oynamadı. Çoxlu qol vəziyyətlərimiz oldu, amma istifadə edə bilmədik. Bu da aydın məsələdi, yenilənmiş heyətlə ilk oyunumuz idi. Düzgün formada hazırlaşırıq, doğru istiqamətdəyik. Səhvlərimiz üzərində işləyirik, çalışacağıq ki, ikinci görüşdə əsas heyəti təyin edək. Toplanışın ikinci mərhələsində texniki və taktiki hazırlıq üzərində işləyəcəyik”.
Xatırladaq ki, "Kəpəz" Avropa Liqasında ölkəmizi təmsil edəcək.
