Sabah Azərbaycan klubları üçün avrokuboklarda növbəti mövsüm başlayır. Sportnet.az-ın məlumatına görə, 1994-cü ildən qitəmiqyaslı turnirlərdə çıxış edən klublarımız sayca 21-ci mövsümdə mübarizəyə hazırlaşır.
Təmsilçilərimizİ ötən mövsümlə müqayisə etsək, yalnız bir dəyişikliyi görə bilərik. Belə ki, "İnter"i "Kəpəz" əvəzləyib.
Əslində, çempionatI 4-cü pillədə bitirən "İnter" Avropa Liqasına vəsiqə qazanmışdı. Sadəcə, "bankirlər" sabiq legionerlərinə olan borclara görə UEFA tərəfindən 1 mövsümlük avrokuboklardan kənarlaşdırılıb. Nəticədə "İnter"dən sonrakı yerin sahibi olan "Kəpəz" turnirdə iştirak etmək hüququ qazandı. "Qarabağ" ardıcıl 3-cü mövsüm Azərbaycanın Çempionlar Liqasında yeganə təmsilçisi olacaq. "Qəbələ" ilə "Neftçi" isə yenə Avropa Liqasında yarışacaqlar.
Start da məhz "Kəpəz"lə olacaq. Həmin "Kəpəz"lə ki, 16 illik fasilədən sonra Avropa səhnəsinə qayıdır. Gəncə klubu sonuncu dəfə 2000-ci ildə Çempionlar Liqasında Makedoniyanın "Sloqa Yuqomaqnat" klubuna evdə buraxdığı qola görə uduzmuşdu - səfərdə 0:1, evdə 2:1.
İndi "Kəpəz"i Avropa Liqasında heç vaxt üzləşmədiyi moldovalılarla sınaq gözləyir. Bu, son vitse-çempion "Daçiya"dır.
Kişinyovu təmsil edən bu komanda indiyədək 1 dəfə bizə avrokuboklarda rəqib olub. Bu, 2007-ci ildə İntertoto kubokunda "Bakı" ilə olub. Onda hər 2 oyunu 1:1 hesabı ilə nəticələnən duelin taleyini Kişinyovda oyunsonrası penaltilər seriyası həll etmişdi. Qələbəyə sevinəın tərəf "Daçiya" olmuşdu.
Bir sıra əsas futbolçularını itirən "Kəpəz" yeni transferlər cəlb etsə də, hər halda, işi heç də asan olmayacaq. Əvvəla, baş məşqçi Şahin Diniyev yeniləşən komanda qurur və xətlər arasında əlaqənin yaxşı vəziyyətdə olması üçün müəyyən vaxt lazımdır. Rəqibin güclü olması da gəncləlilərin işini çətinləşdirir. Heyətində legionerləri çox, oyunçu seçimi geniş olan "Daçiya" qarşısına qrupa düşmək məqsədi qoyub. "Kəpəz"in evdə qol buraxmaması çox vacibdir. Bu, səfərdə qollu heç-heçə ilə mərhələ keçmək şansını saxlayır.
Məlum olduğu kimi, Gəncə şəhər stadionunda müəyyən probelmlər olduğuna görə "Kəpəz" avrokuboklarda Bakıda - Mərdəkanda "Dalğa Arena"da oynamalı olacaq. Bu, Gəncədə güclü azarkeş dəstəyi altında oynayan komandaya əlavə problem yaradır.
"Qəbələ" "Neftçi" isə ilk oyunlarını iyunun 30-da keçirəcək. Əslində, "Kəpəz"lə "Daçiya" da həmin vaxt qarşılaşmalı olsa da, UEFA sonradan tarixi 2 gün əvvələ çəkməyi daha məqsədəuyğun saydı. Bu da komandaların hazırlığını bir qədər də azaltdı. "Qəbələ" da rəqiblərini paytaxtda qəbul etməli olacaq. Bu, ötən mövsümdə olduğu kimi "Bakcell Arena" olacaq. "Neftçi" də həmin stadonunda oynadığından, ilk matçını səfərdə keçirəcək. Rəqib Maltanın "Baltsan" klubudur. "Qəbələ" də "Kəpəz" kimi vitse-çempionla oynayacaq. Bu, Gürcüstanın "Samtredia" klubudur.
"Qarabağ" isə yarışacağı turnirdə I təsnifat mərhələsindən azad olduğuna görə mübarizəyə iyulda başlayacaq. Ağdam klubu Lüksemburqun "Düdelanj" klubu ilk oyununu iyulun 13-də evdə keçirəcək.
