"Qəbələ"nin rusiyalı sabiq baş məşqçisi Yuri Syomin şəxsi "YouTube" kanalını yaradıb. Sportnet.az-ın məlumatına görə, 69 yaşlı mütəxəssis nümayiş olunan videoçarxda bildirib ki, kanalında gənc istedadlı futbolçuları yerləşdirəcək: "Dostlar, azarkeşlər, həmkarlar, Rusiya futbolunun inkişafı üşün nə edə bilərik? Bütün ölkədə ən istedadlı futbolçuları necə tapaq? Mənin ideyalarım, anlayışım var ki, konkret nə edə bilərəm - bu, YouTube kanalını açmaqdır. Sizlər buna futbolu necə oynamağınız, topla necə rəftar etməyinizlə bağlı öz videolarınızı göndərə bilərsiniz. Bəlkə siz həvəskarlar arasında matçın şahidi olmusunuz, yaxud həyətdə istedadlı oğlanı gözaltı etmisiniz? Videoya çəkin və mənə kanalıma göndərin. Və əlbəttə, kanala abunə olun, videolara baxın və səs verin. Ən yaxşılardan yaxşılarına baxıb, diqqətim altında saxlayacağam. Əminəm ki, aramızda eyni fikirlər olacaq ki, onlar öz Messi və Ronaldularını tapmaq ideyasını dəstəkləyəcəklər".
Xatırladaq ki, "Qəbələ"ni çalışdırdığı 1 mövsümdə çempionatın bürünc mükafatçısı edən Syomin "Anji"dən gedəndən sonra xeyli müddətdir işsizdir.
