"Qəbələ"nin yeni transferi Ruslan Qurbanov Avropa Liqasında komandaya kömək edə biləcək. Bu haqda Sportnet.az-a məlumat verən Peşəkar Futbol Liqasının rəsmisi Məlik Həsənov əsasnamənin buna icazə verdiyini bildirib.
Onun sözlərinə görə, 25 yaşlı hücumçu "Neftçi"nin heyətində Avropa Liqasının təsnifat mərhələsində iştirak etsə də, yeni klubunda qrup mərhələsi matçlarda oynaya bilər: "Burada əsas məsələ odur ki, futbolçunun keçidi "transfer pəncərəsi" bağlananadək həll olunub. Təsnifat mərhələsində oynamasından önəmli olan budur. Əlbəttə, Avropa Liqasında əsas mübarizə qrupdan başlayır. Futbolçu əsas mərhələdə oynasaydı, qışadək çıxış edə bilməzdi. Yalnız qışda "transfer pəncərəsi" açılandan sonra yeni kluba keçmək hüququna malik olardı. Ümumiyyətlə, istənilən futbolçu 1 mövsümdə uzağı 2 klubda oynaya bilər. Çempionata bir klubda başlayan oyunçu "tranfer pəncərəsi"nun bağlanmasınadək digər kluba keçib çıxışını davam etdirə bilər. Necə ki, Qurbanov mövsümə "Neftçi"də başlayıb, indisə "Qəbələ"nin futbolçusudur. "Transfer pəncərəsi" bağlanandan snra isə futbolçu başqa klubda nəinki Avropa Liqasında, heç çempionatda da oynaya bilməz. Düzdür, klub sərbəst futbolçunu mövsümün gedişində hər zaman heyətinə cəlb edə bilər. Ancaq Avropada "transfer pəncərəsi" bağlananandan sonra futbolçunu UEFA matçlarına sifariş etmək olmur və yalnız daxili yarışlarda onun xidmətindən istifadə edə bilərsən".
"Qəbələ" ötən mövsüm sentyabrda "Xəzər Lənkəran"da ayrılaraq sərbəst olan müdafiəçi Ruslan Abışovla hücumçu Vüqar Nadirovu heyətinə cəlb etsə də, Avropada "transfer pəncərəsi" avqustun 31-də bağlandığından onları qrup matçlarında oynada bilməyib. Həmin futbolçular yalnız Premyer Liqa və ölkə kuboku oyunlarında baş məşqçi Roman Qriqorçukun sərəncamında olublar.
Xatırladaq ki, Qurbanov "Neftçi"də Avropa Liqasında bu mövsüm 4 oyun keçirib və 1 qol vurub. Bu, I təsnifat mərhələsində Maltada "Baltsan"a 2:0 hesabı ilə qalib gəldikləri ilk oyunda penaltidən vurduğu qoldur.
Mehman Süleymanov
