UEFA Türkiyənin "Eskişehirspor" və "Sivasspor" klublarına qarşı danışılmış oyunlarda iştirak ittihamı ilə iş açıb. Sportnet.az-ın məlumatına görə, hər iki klub 2010-2011-ci il mövsümündə çempion "Fənərbağça"ya bilərəkdən uduzmaqda şübhəli bilinir.
2011-ci ilin mayında keçirilmiş son turda "Sivasspor" 3:4, həmin tarixdən bir ay öncə isə "Eskişehirspor" 1:3 hesabı ilə "Fənər"ə uduzub. Sonradan "sarı-lacivərdlilər" uzun müddətə qitə miqyaslı yarışlardan kənarlaşdırılıblar. Bu mövsüm isə "Sivasspor" Superliqada 5-ci yeri tutaraq, Avropa Liqasına vəsiqə qazanıb. "Eskişehirspor" isə ölkə kubokunun finalında "Qalatasaray"a uduzub. "Cim-Bom" Çempionlar Liqasına qatılacağından, Avroliqaya daha bir vəsiqə finalçıya qismət olub. UEFA-nın şübhələri təsdiqini tapsa, "Sivasspor" və "Eskişehirspor" Avroliqadan kənarlaşdırılacaqlar.
Qeyd edək ki, "Sivasspor"un heyətində Azərbaycan millisinin futbolçusu Cihan Özkara da çıxış edir. Özkara bir neçə gün öncə klubla müqaviləsini daha 2 il uzadıb.
