Bu gün futbol üzrə Azərbaycan Premyer Liqasının IX turunun daha bir oyunu keçirilib. Sportnet.az-ın məlumatına görə, günün yeganə görüşü Şüvəlanda baş tutub.
AZAL Zirənin eyniadlı komandasını qəbul edib. İlk hissə qonaqların üstünlüyü ilə keçib. Matçın 25-ci dəqiqəsində baş hakim Rauf Cabbarov top müdafiəçinin əlinə dəydiyi üçün meydan sahiblərinin qapısına penalti təyin edib. Topa yaxınlaşan Sezar Meza Kolli Aqil Məmmədovun qoruduğu qapıya yol tapıb. İlk 45 dəqiqə "Zirə"nin 1:0 qələbəsi ilə yekunlaşıb.
İkinci hissədə hər iki komanda aktivlik nümayiş etdirib. Lakin bu dəfə "təyyarəçilər" daha dəqiq oynayıb. Nuqzar Kvirtiyanın hava ilə ötürdüyü topu David Canalidze başla tora qovuşdurub - 1:1. Qalan dəqiqələrdə komandaların fərqlənmək istəyi baş tutmayıb.
Oyun 1:1 hesabı ilə başa çatıb.
Bu görüşdən sonra "Zirə" xal ehtiyatını 11-ə çatdıraraq "Kəpəz"lə 4-5-ci pillələri bölüşür. Aktivində 3 xal olan AZAL isə turnir cədvəlinin sonuncu pilləsində yer alıb.
Azərbaycan Premyer Liqası, IX tur
24 oktyabr
16:00. AZAL - "Zirə"- 1:1
Qol: vid Canalidze, 64 - Sezar Meza Kolli, 25 (P)
Hakimlər: Rauf Cabbarov, Coşqun Həsənov, İsgəndər Əliyev, Nahid Əliyev
Əlavə köməkçi hakimlər: Əliyar Ağayev, Rəhim Həsənov
AFFA nümayəndəsi: Elbrus Abbasov
Hakim-inspektor: Xaqani Məmmədov
Bakı. "AZAL Arena"
Qeyd edək ki, turun açılış oyununda "Kəpəz" və "İnter" komandaları qarşılaşıb. Gəncədə baş tutmuş görüşdə hesba açılmayıb.
