2018-ci il dünya çempionatının seçmə qrup mərhələsində Azərbaycan millisi ilə eyni qrupda mübarizə aparan yığma komandalar bu gecə yoldaşlıq görüşləri keçiriblər. Sportnet.az-ın məlumatına görə, C qrupunun lideri Almaniya səfərdə İtaliya ilə üz-üzə gəlib. Matçda hesab açılmayıb.
Son oyunda Robert Prosineçkinin rəhbərlik etdiyi komandanı evdə 4:0 hesabı ilə məğlub edən Şimali İrlandiya bu dəfə Xorvatiyanı qəbul edib. Prosineçkinin qisasını həmyerliləri darmadağınla alıblar.
Çexiya yığması isə Danimarka ilə öz meydanında keçirdiyi oyunda erkən qolla hesabı açsa da, üstünlüyünü əldən verib. Göründüyü kimi, rəqiblərimizin heç biri qalib gələ bilməyib.
Qeyd edək ki, 4 oyundan sonra C qrupuna 12 xalla Almaniya yığması liderlik edir. Aktivində 7 xal olan Şimali İrlandiya və Azərbaycan komandaları müvafiq olaraq 2 və 3-cü pillələri bölüşür. Çexiya yığması 5 xalla 4-cü, Norveç isə 3 xalla 5-ci pillədə qərarlaşıb. Qrup sonuncusu San Marinonun aktivində isə xal yoxdur.
15 noyabr
23:30. Çexiya - Danimarka - 1:1
Qollar: Antonin Barak, 8 - Nikolay Yorgensen, 39
23:45. İtaliya - Almaniya - 0:0
23:45. Şimali İrlandiya - Xorvatiya - 0:3
Qollar: Mario Mancukiç, 9, Duye Çop, 35, Andrey Kramariç, 68
