Azərbaycan Premyer Liqasında milli komandaların oyunları ilə əlaqədar yaranan iki həftəlik fasilə başa çatır.
Sportnet.az-ın məlumatına görə, XII tur iki gündə bərabər sayda matçla keçiriləcək.
Turun açılış günündə liderlər ev oyunlarına çıxacaq. "Qəbələ" ilk dövrədə məğlub etdiyi "Zirə"ni qonaq edəcək. Adil Şükürovun komandası ötən çempionatda gümüş medal uğrunda "qırmızı-qaralar"dan üstün olsa da, bu mövsüm hələ ki heç ilk üçlükdə yer almayıb. Son vaxtlar xal itkiləri nəticəsində "Qarabağ"ın ona çatmasına imkan yaradan Roman Qriqorçukun komandası mütləq qalib gəlməlidir.
"Zirə"nin qonşusu olan "Kəpəz" isə "Qarabağ"ın qonağı olacaq. Şahin Diniyevin komandası ötən çempionatda rəqibinə 4 matçın hamısında uduzsa da, bu dəfə ilk dövrədə evdə xal ala bilib. Özü də Ağdam klubu həmin matçda məğlubiyyətdən xilas olub. "Qarabağ" son oyunlarda qələbələri sıralayırsa, Gəncə təmsilçisi buna həsrət qalıb.
Şərikli liderlərin ən yaxın izləyicisi olan "İnter" autsayder AZAL-ı qəbul edəcək. Ancaq bu rəqibin ötən tur lider "Qəbələ"ni büdrətdiyini unutmaq lazım deyil. AZAL bugünlərdə 45 illik yubileyini qeyd edən baş məşqçisi Tərlan Əhmədovun ad gününə qələbə hədiyyə etməyə çalışacaq.
Fasiləyə qələbə ilə çıxan "Neftçi" bu dəfə səfərdə oynayacaq. "Sumqayıt" məhz Elxan Abdullayevin "ağ-qaralar"da baş məşqçiliyi dövründə onu rəqib meydanında məğlub etmişdi. Bu komandalar turnir cədvəlində qonşudurlar. "Neftçi" qalib gələrsə, sumqayıtlıları qabaqlayaraq nəhayət, 7-ci pillədən canını qurtula biləcək.
19 noyabr
15:00. "Qəbələ” – "Zirə”
Hakimlər: Ömər Paşayev, Knyaz Əmiraslanov, Vüsal Qənbərov, Akif Əmirəli
Əlavə köməkçi hakimlər: Əliyar Ağayev, Orxan Məmmədov
AFFA nümayəndəsi: Eldəniz Musayev
Hakim-inspektor: Əli Hüseynov
Qəbələ. Şəhər stadionu
Birinci dövrədək oyun - 2:0
18:00. "Qarabağ” – "Kəpəz”
Hakimlər: Fariz Yusifov, Coşqun Həsənov, Nahid Əliyev, Yaşar Abbasov
Əlavə köməkçi hakimlər: Rəhim Həsənov, Ramil Diniyev
AFFA nümayəndəsi: Maşallah Əhmədov
Hakim-inspektor: Asim Xudiyev
Bakı. "Azərsun Arena” stadionu
Birinci dövrədəki oyun - 1:1
20 noyabr (bazar)
14:00. "Sumqayıt” – "Neftçi”
Hakimlər: Rəhim Həsənov, Namiq Hüseynov, İsgəndər Əliyev, Azər Əsgərov
Əlavə köməkçi hakimlər: İnqilab Məmmədov, Ramil Diniyev
AFFA nümayəndəsi: Sakin Məmmədzadə
Hakim-inspektor: Əhmədağa Cabbarov
Sumqayıt. "Kapital Bank Arena” stadionu
Birinci dövrədəki oyun - 2:1
16:00. "İnter” – AZAL
Hakimlər: Əliyar Ağayev, Rza Məmmədov, Zeynal Zeynalov, Mübariz Haşımov
Əlavə köməkçi hakimlər: Orxan Məmmədov, Fariz Yusifov
AFFA nümayəndəsi: Ramiz Abdullayev
Hakim-inspektor: Rövşən Əhmədov
Bakı. "İnter Arena” stadionu -
Birinci dövrədəki oyun - 3:1.
